Bandièra01 1180x150: Comuna de Tolosa

Actualitats

Rugbi XIII: Carcassona capvira lo Molin

 Un afrontament bèl en tres episòdis: Anglatèrra-Nòva Zelanda!
Un afrontament bèl en tres episòdis: Anglatèrra-Nòva Zelanda!
Dissabte, avèm perdut lo sorire amb lo resultat del XIII de França; dimenge, nos sèm arregalats a la partida Lesinhan-Carcassona.
 
 
Trafalgar tretzista
 
Se sap lo valat entre los tres grands (Austràlia, la Nòva Zelanda e Anglatèrra) e las autras formacions tretzistas de la planeta. Mas, a un tal punt!!!
 
Paures Blaus, chapats tot cruses pels angleses dins una partida “amicala” pas que de nom: la desfaita mai gròssa de l’istòria, 84-4.
 
La question se torna pausar, mai aguda cada còp, d’una politica engatjada de la Federacion per la formacion nacionala que remplaçariá un rendètz-vos d’octòbre amb un estagi cort, un entraïnaire vengut d’endacòm mai, de Dracs desmobilizats...
 
Se mobilizar, es ben l’objectiu per anar afrontar Galas aqueste divendres e, almens, per ganhar lo torneg europèu.
 
Los angleses e los Kiwis començaràn la tièra de tres confrontacions aqueste dimenge 1r de novembre a Hull.
 
 
Carcassona d’ataca!
 
En campionat, dissabte, Vilanuèva resistiguèt tant coma poguèt mas perdèt fàcia a Palau: 28-16. Limós se passegèt a Tolosa: 52-18.
 
Dimenge, los Dragonets estrilhan Avinhon 66-6. S’esperava un afrontament bèl al Molin entre Lesinhan e Carcassona; mas la partida virèt lèu-lèu a l’avantatge dels vesitaires, qu’avián causit de faire córrer la palma d’una ala a l’autra, amb un sosten permanent als portaires del balon. La defensa locala i perdèt l’orèmus. A la pausa, los Canaris menavan 28-6. Confirmèron lor superioritat dins lo segond temps per ganhar 47-18.
 
Dimenge, las quatre formacions de cap se rescontraràn: Carcassona recebrà los Dragonets e i aurà un novèl dèrbi a l’Agulha entre Limós e Lesinhan.
 
Las autras esquipas ensajaràn de conéisser los plasers de la victòria: Avinhon recep Vilanuèva dissabte e Albi anarà a Palau dimenge.
 
 
Un aucèl sens alas?
 
Vaicí la croniqueta occitana del mesadièr XIII Magazine (numèro d’octòbre; amb abonament: 38 èuros; Treize-Rugby-Events Axe-Sud 49, Grand Carrièra Sant Miquèl, 31400 Tolosa):
 
“Lo kivi-kivi (es atal que se ditz l’aucèl Apteryx australis australis en maòri) es una mena de galina de Nòva Zelanda: patas cortas, alas cortas, patas arpudas, bèc longarut.
 
Lo kivi-kivi, lo mascle, demòra al nis per coar e defend a còps de bèc se cal los uòus bèls.
 
Lo kivi-kivi s’amaga de jorn dins las falguièras, sortís negre dins la negra nuèit amb la mina desplumada de sas plumetas maurèlas.
 
Lo kivi-kivi de babòtas e cagaròts fa taulejada, lo plen ventrat. Òu, mesfisa-te dels furets e autres opossòms!
 
Lo kivi-kivi, Apteryx australis australis, es a l’encòp un simbòl bèl del temps passat e un crit d’espèr per un avenir de salvagàrdia de totes los aucèls, de totas las bèstias!
 
Mas çò que dison pas los tractats d’ornitologia, es que lo kivi-kivi a mai de fòrça qu’un leon britanic e que sauta mai naut qu’un cangoró d’Austràlia. E quand vesètz Tuivasa-Sheck o Krisnan Inu córrer long de la tòca, cal gausariá dire que lo kivi-kivi a pas d’alas!”
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch carcassona
1.

Partida Carcassona-Dragonets remandada.

  • 0
  • 0

Escriu un comentari sus aqueste article