Bandièra01 1180x150: Comuna de Tolosa

Actualitats

E se desapareishèva?

Miaças seriosas sus un petit jornau en occitan que sent la tèrra s’esbrigalhar devath las soas fondacions. Alarma!

| JJF



Maishanta tempsada per la lenga occitana. Qu’an vist lo gran interès portat per lo Senat, la dita “hauta assemblada” qui s’es abashaida en n’acabant viste hèit dab la possibilitat de ratificar las brigalhas de la “CELRÒM” au mesprètz deus territòris qu’es censada representar. Que caleré benlèu estar diplomat en dret constitucionau per comprene quauquarren; o tornar léger las leçons florentinas de Nicolau Maquiavèl... Lo tracanard redobtat a foncionat. De tot biaish, que saben dempuish bèra pausa que los guardians deu temple republican, especiaument lo Conselh d’Estat e lo Conselh Constitutionau, son fondamentaument opausats a las lengas deus pòbles de França. Aqueth debat avortat que sembla un aute aspècte pregond de la societat francesa “blocada”, dont parlavan dens los ans 1970. Aquò que contunha suu plan lingüistic e culturau. Mes e se’n cau estonar?
 
Aute aspècte d’aquera maishanta passa, la miaça que pesa suu jornau La Setmana. Quan recebèri lo numèro 1035 (16/10), qu’estori estomagat en vedent lo títol, en blanc sus hons negre: “E se la Setmana desapareis?” La petita e valenta “scop” (societat obrèira de produccion) Vistedit qu’a quauques tesics deus seriós. Los abonats que baishan: qu’i a dificultats tà captar joenes legidors (causa coneishuda dens la premsa en generau), per trobar un lectorat fidèu en Provença, Lemosin o Auvèrnhe, e quitament qu’entenen arcasts de quauques lengadocians qui repròchan au jornau d’emplegar tròp lo gascon. Los gascons, eths, son com pro de gents dens aqueth mond: son sarrapiastres qui ne vòlen pas guaire hicar la man au pòrtamoneda. E, per estar complet, la petita còla de La Setmana qu’a besonh de còpias per plenhar las 16 paginas setmanèras.
 
S’aquera publicacion s’estupava, que seré un maishant còp de mei a la lenga nòsta. Totun, que hè un vertadèr esfòrç, dempuish vint ans, per barrejar los subjèctes, har retrèits originaus, prepausar analisis interessantas: un prètzhèit coratjós. Haut! que la cau ajudar: Vistedit, BP 50486, 64238 Lescar Induspal Cedèx; +33(5) 59 81 02 59 o vistedit@w...
 
 
 
Joan Jacme Fénié

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Xavièr
4.

Qualqu'un sap de qu'es venguda l'emission de ràdio ''Good Morning Occitània'' ? Perqué s'ausís pas pus ?

  • 3
  • 0
ltrobat
3.

Lo dialecte emplegat dens lo jornau qu'èi lo qu'ecríven los jornalistes. N'i a pas longtemps, los gascons qu'arromegavan per'mor La Setmana qu'èra escriuda a mei de 80% en lengadocian...
Los que ne son pas contents de trobar trop de tau o tau dialecte n'an pas qu'a préner lo calam e escríver articles dens lo lor dialecte.

  • 14
  • 0
Pirolet
2.

Seriá una catastròfa. Ieu qu'i soi abonat dempuèi l'an pebre, quand vesi que n'i a que fan los refastinhoses... e qu'aquò va pas plan, e qu'aquò tanpauc, e an pas parlat d'aquò, e aquò perdequé nos'n parla, e patin e cofin. Segur que vivon dins un mond perfièch. Benlèu se legisson los setmanièrs en francés de pòst a fin?

  • 5
  • 0
Sèrgi VIAULE
1.

Mercés a Joan-Jacme per aquesta crida de sosten. La Setmana es complementària a Jornalet.com e reciprocament. La desaparicion de La Setmana seriá una regression de las gròssa pel moviment occitan de resistància.

  • 33
  • 4

Escriu un comentari sus aqueste article