Dimars, 1 de decembre de 2015, 03h00 Espòrt
Los rescontres entre Carcassona e Limós an totjorn una sabor particulara. Una novèla demostracion foguèt faita aqueste dimenge sus l’Estadi Domèc
Dimenge de fèsta a Domèc
La debuta de l’ivèrn volguèt plan acompanhar de sos rais de solelh aqueste dimenge de vèspre pel rescontre entre los primièrs, los Canaris de Carcassona, e los segonds, los Grizzlies de Limós. Las doas formacions joguèron a tè tu tè ieu pendent 80 minutas. Carcassona menèt 10-2, puèi Limós passèt davant, 14-10, mas a la còrna, los Canaris prenguèron l’avantage 16-14. Avantatge que confirmèron tre la represa per menar 34-20 a l’ora de jòc. Solament, Limós abandona pas jamai. Los Roges e Negres, reduits a 12 dempuèi la fin del primièr temps, tornèron a egalitat 36 pertot a tres minutas del tèrme. Cada esquipa aguèt l’escasença d’ensajar d’ensacar un tombat victoriós mas la marca ne demorèt aquí. Son de regretar los dos cartons roges (un de cada part) un bricon sevèrs per una partida engatjada de segur, mas jogada dins un bon esperit. Mas, a 12, Limós trapèt lo mental e la determinacion per contestar los carcassoneses. En un mot, Limós joguèt mai amb l’esperit “dèrbi”.
D’aquel temps, Lesinhan plegava sus sa pelena fàcia als volontaris catalans de Palau 23-20 e daissan la tresena plaça als Dragonets que baton sens problèma Tolosa 48-4. Dimenge, lo rescontre al Molin, entre las doas formacions, serà d’importància per obténer la tresena plaça qualificativa pel grop bèl de la segonda fasa.
Albi anèt ganhar 35-30 a Vilanuèva e recebrà amb un brave moral Avinhon aqueste dissabte (19h). Los autres rescontres de l’onzena jornada seràn, aqueste dimenge: Tolosa-Vilanuèva e Limós-Palau.
Presents de Nadal
Los Dracs venon de dobrir un espaci pels mainatges dins lor botiga de Brutus, ont poiretz tanben trapar lor agenda de 2016 o encara un perfum estampilhat Dracs: lavandin, bergamòta, fusta de cèdre, fava Tonca, menta pebrada, baselic e moja. Lo XIII a bona flaira!
Alan Roch
Comentaris
I a pas cap de comentari
Comenta
Lo comentari es estat mandat corrèctament
Cap de comentari
En cargar
Cap de comentari
Mandar
