Bandièra01 1180x150: Comuna de Tolosa

Actualitats

BaRuLa: un ret social innovant per descobrir e partejar lo país en occitan

“Un viatge ont lo camin compta mai que l’arribada amb l’idèia de se passejar per far de torisme intelligent”

Ven d’espelir un nòu sit web collaboratiu per descobrir e partejar d’endreches e d’afars sul territòri d’Occitània dins la lenga del país. Nomenat BaRuLa.de, un nom que s’inspira del mot “barrutlar”, lo sit es una mena de guida toristica e de ret social a l’encòp. “Me soi pas inspirat de qué que siá. Benlèu existís en francés mas aicí lo barrutlatge es un viatge ont lo camin compta mai que l’arribada. L’idèa es de se passejar per far de torisme intelligent”, çò ditz lo conceptor del sit, Danís Chapduelh, interrogat per nòstres confraires de France 3 sul blòg de l’occitan.
 
BaRuLa es, plan segur, un ret social innovant que s’es desvolopat en Occitània e tot en occitan per redescobrir amb un sens nòu las petitas istòrias que fan l’istòria del país, per far de vida sociala e de ligams, per escambiar de coneissenças e per se passejar en Occitània e endacòm mai. Lo sit es dobèrt a totes, e dins aquel sens l’administrator del sit encoratja a participar tanben los que mestrejan pas la lenga: “contactatz-nos e trobarem una solucion”, çò es escrich.
 
Es pas un projècte lucratiu e es pres en carga per l’administrator. Sul sit i a una seccion per sosténer economicament las despensas d’aquela mesa en marcha. Per ara, an de besonh d’un pauc mai de 100 èuros per l’albergament del sit e la proteccion del domeni (barula.de e sos sinomims .eu, .info, .org). Pasmens, amb l’argent que se collectarà de mai, s’aumentarà l’espaci de resèrva, se poirà gratificar los desvolopaires, se captariá de licéncias d’extension e mai se poiriá engatjar un desvolopaire exterior. En mai d’aquò, la còla barrutlaira a mai de causas previstas per l’avenir.
 
La còla de Jornalet saludam lo nòu sit e esperam que capite plan. Dins aquel sens metèm las paginas d’aqueste jornal a la disposicion de la còla de BaRuLa e esperam que lèu se poirà organizar quitament d’eveniments per que los barrutlaires nos rescontrem.
 
 
 

barula.de

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Melanie Besièrs
1.

M'agrada!

  • 11
  • 0

Escriu un comentari sus aqueste article