Carcassona en baissa de forma, Avinhon e Limós que petan lo fuòc, Lesinhan que repren de fòrças: atal se pòt resumir aquesta jornada del campionat d’Elèit.

La revòlta de las Corbièras
 
Dissabte, la jornada de campionat d’Elèit 1 se dobriguèt amb la victòria anonciada de Limós suls Broncos de Tolosa: 62-18. Sens comentaris.
 
Dimenge, Palau s’impausèt sens dificultats a Vilanuèva: 60-22. Sus sa pelena, Avinhon, esquipa en forma del moment, bat Sant Estève-XIII Catalan: 34-24. A Domèc, se vegèt que Lesinhan s’èra fait brandir las pelhas aprèp la desfaita a domicili de dimenge passat. En fàcia, l’AE Carcassona presentava una esquipa amb plan de modificacions que l’infirmariá desemplena pas. Los Senglars de las Corbièras joguèron un dèrbi, los Canaris una simpla partida e la diferéncia se faguèt a l’avantatge dels vesitaires que meton fin a l’invincibilitat carcassonesa e ganhan 32-20.
 
Dimenge que ven, lo calendièr se metrà a jorn amb la partida Vilanuèva-AE Carcassona que se joguèt pas lo 14 de novembre passat.
 
 
Entre audencs e catalans
 
Dissabte 9 de genièr, los Dracs catalans seràn a Carcassona per jogar lor primièra partida de la sason. Serà l’escasença d’una granda jornada esportiva e festejaira. Tre lo matin, sus l’estadi Benausse, s’afrontaràn las seleccions catalanas e audencas dels U13 e U16. Del temps de miègjorn al gimnasi del Viguièr, se jogarà la partida de campionat de XIII cadieral entre catalans e Biàrritz. A l’Estadi Domèc, a 2 oras del vèspre, rescontre dels U19-Dragonets e de la seleccion junior audenca. La partida bèla se jogarà a 4 oras e mièja entre la seleccion audenca dels Chivalièrs Catars amb los melhors jogaires de Carcassona, Lesinhan e Limós e los Dracs catalans que presentaràn lo grop novèl per la sason 2016. Una serada, amb una taulejada, seguirà dins la Sala del Dòma amb projeccion de resumits de las finalas de Copa e Campionat entre catalans e audencs de las 40 annadas passadas. Alara reservatz vòstre dissabte 9 de genièr per èsser a Carcassona!
 
 
Lo temps dels vòts
 
Vaquí un an novèl, nomenat 2016, que va començar. De fait, sul plan rugbi, marca pas la sason novèla: tròp vièlh pel campionat d’Elèit, tròp jove per l’NRL e la Superliga. Mas cal plan dire de vòts per aver dreit de manjar la còca dels Reis, i trapar una fava ovala e beure una copa de blanqueta! 
 
Alara nos cal desirar que l’annada 16 siá XIII d’a fons amb de partidas de tria (aürosament qu’avèm lo còr solide!); un Campionat d’Elèit que monte a 10 o 12 esquipas; una finala a Wembley o Manchester pels Dracs; l’ascensor cap a la Superliga 2 pel Tolosa Olimpic; de faissas que refofen de mond; mai d’imatges a la television e mai d’articles dins la premsa; un grop França que se meta sul bon camin per preparar lo rendètz-vos mondial de 2017…
 
Que l’amor de nòstre espòrt faga tirar totòm dins lo meteis sens per èsser mai fòrts e amb mai de vam per desvolopar la practica del nòstre rugbi-farfadet! E, per tant, se cal pas acontentar de desirar, mas es fòrça important de faire quicòm de positiu, de s’investir un pauc mai cadun e caduna a son nivèl! E de se dire de longa: “Lo XIII, aquò òc!”
 
 
 
 
Alan Roch