Represa 2016 plan-planet del costat del rugbi de XIII, mas genièr serà plan fornit amb las decisions de la primièra fasa dels campionats d’Elèit, los oitens de la Copa e lo retorn sus la pelena dels Dracs tre aqueste dissabte 9.
 
 
Mai complicat que previst
 
La sola partida al programa d’aqueste dimenge 3 èra lo rescontre en retard entre lo darrièr Vilanuèva e l’AE Carcassona. Amb un temps un pauc poirit e la valentesa dels Laupards a l’ostal, la partida foguèt mai sarrada que çò que se podiá pensar. Pau dobrissiá la marca pels Canaris tre l’8a minuta, Bouregba replicava a la 21a, Pau tornava darrèr la linha (24a) mas un ensag de l’insasible mesclanha Lavesnes, trasformat per Vick, fasiá virar los locals primièrs 10-8 a la pausa.
 
A la represa, Albèrt e Renu (mai doas transformacions per Albèrt) balhavan l’avantatge a Carcassona, 20-10, qu’encaissava un ensag sus la còrna: victòria 20-14 pels Canaris que tornan prene la primièra plaça al classament. Las doas esquipas se tornaràn trapar a Domèc lo 17 de genièr.
 
Aquesta dimenjada, en rason de la partida Chivalièrs-Dracs, solament doas partidas seràn jogadas pel compte de la 15a jornada: Albi-Palau (dissabte, 19h) e Vilanuèva-Avinhon (dimenge, 15h).
 
 
Lo truc
 
Dissabte veirà la venguda dels Dracs dins lor version 2016 a Carcassona per rescontrar la seleccion audenca d’Elèit 1, nomenada los Chivalièrs Catars. Serà l’escasença de descobrir los novèls jogaires sang e aur. Serà una brava e polida jornada de XIII del matin al còr de la nuèit amb quatre oposicions U13, U16, juniors e seniors entre audencs e catalans amb lo sòmi de veire un jorn un dèrbi que seriá pas mai amical mas que comptariá per la Superliga!
 
 
 
 
Alan Roch