Bandièra01 1180x150: Comuna de Tolosa

Actualitats

Atemptat suicidari al centre istoric d’Istambol

Almens dètz personas son mòrtas, dont la majoritat de toristas

Almens dètz personas mòrtas: es lo bilanç d’una explosion que i aguèt ièr de matin sus la Plaça Sultanahmet, al centre vila d’Istambol, un endrech fòrça pròche de la Mosqueta Blava e de Santa Sofia. Segon los mèdias locals, l’atemptat es òbra d’un terrorista suicidari que se faguèt espetar.
 
La majoritat de las victimas son de toristas dont un ciutadan norvegian, un perovian e almens nòu alemands. De fach, segon qualques testimònis, un grop de toristas venent d’Alemanha èran dins aquel quartièr quand se produguèt l’explosion.
 
Coma o rapòrta Le Monde, que ne fa un seguiment en dirècte, l’autor de l’atac es un resident sirian nascut en 1988, segon l’identificacion menada sus las rèstas de son còrs.
 
 
Blocatge mediatic
 
Pasmens, las informacions arriban amb de dificultats. Immediatament après l’explosion, lo govèrn turc impausèt un blocatge als mèdias “en nom de la seguretat estatala”.
 
Aquel blocatge l’an mençonat divèrses mèdias coma la cadena CNN Türk e l’agéncia oficiala Anatolia, en tot publicar lo primièr bilanç uman difusat per lo governador d’Istambol.
 
La correspondenta del New York Times, Ceylan Yeginsu, explicava sus Twitter que “de policièrs empedisson de jornalistas creditats de prene de fòtos a causa de l’enebicion”.
 
 
Tolerància amb l’Estat Islamic
 
L’atac arriba tres meses après l’atemptat mai crusèl de l’istòria contemporanèa del país, ont 102 personas moriguèron a causa d’un doble atemptat suicidari revendicat per l’Estat Islamic. Las politicas turcas de repression contra los curds e de tolerància amb lo grop jihadista a entraïnat ja divèrsas tragèdias.
 
 
 
 


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma
1.

L'EI ha assassinat a turistas alemanhs, perquè un o dos avions alemanhs han participat en operacions a Irac e Siria.

  • 1
  • 0

Escriu un comentari sus aqueste article