Bandièra01 1180x150: Comuna de Tolosa

Actualitats

Rugbi de XIII: festenal a Avinhon

Dracs: concentracion abans de dintrar sus la pelena
Dracs: concentracion abans de dintrar sus la pelena
Abans la debuta tre dijòus del campionat 2016 de Superliga, la 17a jornada del Campionat d’Elèit vegèt una partida supèrba se debanar en tèrra vauclusenca.
 
 
Danças sul Pont d’Avinhon...
 
…O puslèu sus la pelena sintetica de l’Estadi Sant Ruf ont las formacions de l’EO Avinhon e Carcassona prepausèron un rugbi ofensiu e engatjat. Cada formacion podiá comptar amb un expèrt de las manòbras collectivas: los dos mièges de dobertura, Maxim Gressèque pels Canaris e Joris Bissière pels Bisonts. Haydn Peacock dobrissiá la marca d’entrada (4a) pels Jaunes, mas lo segonda linha blau e blanc Porret li respondiá (10a). Aprèp una ataca a la man al cinquen tengut qu’anava d’una ala l’autra, l’alièr Renu puntava l’ensag (30a), mas Bissière tornava metre las doas esquipas a egalitat (10-10) sus un còp de rens a la darrièra minuta (39a) del primièr temps.
 
Los provençals tornavan sul terren amb unas cambas de fuòc e fasián lo trauc amb dos ensages del centre australian Kiernan en cinc minutas: a la 47a, a la recepcion d’una passa al pè e a la 51a aprèp una ofensiva partida de la linha avinhonenca: 22-10 pels locals.
 
La partida anava virar de fisionomia amb l’intercepcion de l’alièr audenc Alèxis Escamilla (56a) que marcava entre los pals aprèp 70 mètres de corsa. En estat de gràcia, en cap de linha, l’alièr bonificava doas atacas carcassonesas (61a e 64a). A cinc minutas del tèrme, lo segonda linha Koma Samson liberava una palma per son talonaire Jonatan Som que marcava. Amb las transformacions e una penalitat a la darrièra minuta (80a) de Maxim Gressèque, los vesitaires ganhan 32-22. Lo public a pas agut lo temps de bufar long de 80 minutas d’un jòc intensiu. Òm ne torna demandar!
 
Las partidas del dimenge foguèron pas del meteis nivèl. Lesinhan metèt una orada abans de prene la mesura d’Albi e comptèt amb sas individualitats per faire la diferéncia: 30-14. Vilanuèva vendèt carament sa pèl de Laupard, mas perdèt un còp de mai e acaba la primièra fasa amb 16 desfaitas en 16 partidas: victòria de Limós 25-12.
 
Carcassona es assegurada de jogar la Pola dels Asses de la segonda fasa. Demòran encara tres en corsa per las doas autras plaças: Limós, Lesinhan e los Dragonets. La jornada de ratrapatge de la dimenjada es doncas d’una importància màger. Dimenge, se jogaràn Dragonets-Carcassona (a Sant Estève) e lo dèrbi Lesinhan-Limós que valdrà lo desplaçament. Tre dissabte, Palau anarà rendre vesita a Tolosa per una partida entre mal classats.
 
 
Superliga: Leeds-Warrington en dobertura
 
La primièra partida de la sason de Superliga se jogarà dijòus de ser: los campions 2015, Leeds, recebràn los Lops de Warrington. Se doas partidas se jogaràn dimenge, Hull KR-Castleford e Wakefield-Widnes, las autras 3 son programadas divendres en serada: Hull FC-Salford, St Helens-Huddersfield e Wigan-Dracs. Los Dracs començan cò d’una formacion de las mai fòrtas, una valor segura e istorica de la competicion. Aurem ja una indica per saupre se los meses de preparacion an permés de tornar bastir una formacion, marcada per un bèl nombre d’arribadas: los alièrs Joe Broughton e Pat Richards, lo mesclanha Richie Myler, lo talonaire papó Paul Aiton, lo pilar Dave Taylor, los segondas linhas Glenn Stewart e Justin Horo e lo retorn dels nafrats, lo centre Vincenç Duport e lo pilar-capitani Remi Casty. La partida de dijòus e lo desplaçament dels Dracs se poiràn seguir en dirècte sus Bein Sport.
 
 
 
Alan Roch
 



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article