Coma cada dimenjada, avèm agut nòstre lòt d’emocions e de reviraments de situacion amb los multiples rescontres de XIII d’Euròpa e d’Oceania.
 
 
Dragons: de l’art de balhar la victòria a l’adversari
 
Aprèp la brava victòria dels juniors sus Warrington (46-22), los Dragons mostrèron de bonas intencions, menèron la partida plan de temps per, a la fin de las fins, plegar dins las doas darrièras minutas e, coma la cabra d’En Seguin, se faire manjar tot cruses pels Lops de Warrington: 30-20. Se parlèt de quauquas decisions contràrias dels arbitres, mas çò evident es que cinc decas catalanas se mudèron d’un biais mai que realista en ensages transformats pels angleses: una palma perduda dins sos 20 m, un còp de pè contrat dins lo primièr temps; un remandadís dirècte en tòca, una penalitat inutila sus un darrièr tengut e una passa desesperada aprèp la còrna. Se cal tornar metre a l’òbra amb un desplaçament cò dels Gigants d’Huddersfield dissabte abans lo terrible temps de Pascas e sas tres partidas en nòu jorns: desplaçament a Salford lo divendres 25, recepcions de Castelford lo diluns de Pascas e de Widnes lo dissabte 2 d’abril a Brutus.
 
Warrington a per l’ora ganhat sas 5 partidas, coma Wigan, venceire del campion Leeds que per l’ora trigòça sas penas: 28-6; las autras partidas se clavèron sus de bravas diferéncias entre ganhants e perdents: 46-6 per Widnes contra Hull-FC, 44-4 per St Helens contra Wakefield, 38-6 per Huddersfield contra Hull-KR e victòria 32-16 de Salford a Castleford.
 
 
Limós monta sul cloquièr
 
En un dimenge de fin de carnaval e una setmana abans la 27ena edicion de Tòcas e Campanals, la formacion limosenca s’impausa contra una formacion carcassesa tristoneta. Las doas primièras accions localas s’acaban darrièr la linha: 10-0 e se l’ASC capita a la mièja ora a tornar a 14-14, los roge e negre ne meton un còp per menar 24-14 a la pausa. Los canaris trapèron pas cap de solucion dins lo segond temps per contrariar las pretensions localas. Los limosencs ajustèron un ensag transformat e tres penalitats a la nòta: 36-14.
 
En pola 2, a Sant Estève, calguèt dos ensages de Morgan Escarré per que los Dragonets batèsson Avinhon 22-14. En pola 3, Vilanòva signa sa primièra victòria de la sason en campionat a Tolosa: 31-30.
 
 
Tolosa pren sas marcas
 
Per sa part, en Liga 1, a Blanhac, l’esquipa primièra del Tolosa-Olimpic faguèt montar lo planchòt a 74-0 en signant 14 ensages fàcia als Hemel Stags. Plaça a la Cup dissabte amb la recepcion de Gloucester pels 1/32en de finala (15h30, estadi de Blanhac).
 
 
Carcassona, ciutat del XIII
 
Dels pichons als bèls, Carcassona coneisserà una granda jornada de XIII aqueste dimenge 20 de març.
 
A la Plana Mairevièlha, tre lo matin, se debanarà lo Torneg dels joves Grégoire amb mai de mila jogaires dels primièrs passes als benjamins.
 
A la Pepinièra, lo vèspre serà consacrat a las mièjas finalas de Copa: Lesinhan-Palau en Copa Nitard dels juniors e un novèl dèrbi per las formacions d’Elèit 1 en Copa Lòrd-Dèrbi entre Limós e Lesinhan.
 
Las autras mièjas finalas se debanan dissabte de vèspre a Tolosa: Albi-Avinhon en juniòrs e Dragonets-Albi en Copa de França. Es lo Walter Spanghero que tirèt al sòrt aquelas confrontacions la setmana passada a Tolosa.
 
 
Lapinons de prima
 
De l’autra part de la planeta, de notar la victòria bèla dels Lapinons suls Chivalièrs de Newcastle 48-6, la desfaita dels campions Vaquièrs en cò de las Anguilas de Parramatta 20-16, la victòria de Brisbane suls Combatents neozelandeses 25-10 e lo tombat que fa la diferéncia 21-20 per Canberra fàcia als Poletons de Sydney.
 
 
 
 
Alan Roch