A veire las resultas de la dimenjada tretzista, se pòt creire que los catalans an festejat Sant Jòrdi amb una setmana d’avança!
 

Broughton se met en quatre
 
E aquò comencèt dijòus en serada del costat de Saint Helens. Dins lo primièr temps, l’alièr Drac Jodie Broughton puntèt tres ensages e los catalans menavan 14-12. Dins lo segond temps, marquèron dos còps d’entrada per Myler e Richards, puèi Broughton ajustèt una quatrena realizacion e Richards una penalitat. Victòria catalana: 30-12! Seisena en seguida, tièra en cors...
 
Coma Warrignton perdèt cò del darrièr, los Gigants d’Huddersfield, 11-0, que Wigan batèt Castleford 26-12 e que Leeds ganhèt contra Hull FC 20-18, vaquí que los Dracs se trapan en segonda plaça al classament a la fin de las partidas anar a egalitat de punts amb lo primièr Warrington e amb Wigan. Es de notar la plan espantanta onzena plaça del campion Leeds.
 
Dissabte, los Dracs recebràn los Diables de Salford a Brutus (18 h). Logicament, la tièra de victòrias deuriá contunhar mas la Superliga es pas totjorn abonada a la logica....
 
 
Copa: los Dragonets sens tremolar
 
Dissabte, Carcassona recebiá las finalas de las Copas. En juniors, Albi ataquèt d’entrada per menar 28-12 a la pausa. La partida èra pas plegada. Los valents lesinhaneses pensèron de tornar a la marca, mas un darrièr esfòrç dels Tigres confirmèt la victòria albigesa: 36-28.
 
Aprèp la finala del campionat a 7 (victòria de l’Escura sus Avinhon: 20-16), mai de 5000 espectators poguèron seguir la finala de la Copa Lord-Derby entre Sant Estève XIII Catalan e Limós. Un primièr temps equilibrat: dos ensages per cada esquipa, 12-10 pels catalans qu’anavan faire lèu la diferéncia dins lo segond temps e confortar la victòria: 33-16. Es lo primièr trofèu que ganhan los Dragonets dempuèi que son resèrva de la formacion de Superliga.
 
Aquesta dimenjada, se jogaràn los barratges del campionat amb las oposicions Dragonets-Vilanuèva e Palau-Albi.
 
 
Tolosa en oiten de Cup
 
Dissabte, a Blanhac, la Tolosa Olimpica recebiá pel compte de la Cup lo cap de fila del Championship: los Centurions de Leigh. Aquò permetèt a la formacion occitana de mostrar sa valor e al tèrme d’una partida sarrada de ganhar 10-8. Dimenge, retorn al campionat amb un desplaçament a Rochdale.
 
Aqueste torn de Cup, a vist l’eliminacion d’Hull KR per Oldham 36-22.
 
Los oitens de finala amb l’entrada en jòc de las 8 formacions bèlas de Superliga se tendràn los 7 e 8 de mai. Tiratge al sòrt aqueste dimars 19 d’abril.
 
 
XIII Units
 
Dissabte de matin, a Carcassona, dins una conferéncia de premsa, l’ancian internacional e cap d’entrepresa (magazins d’espòrt), Marc Palanque, anoncièt sa candidatura a la presidéncia de la Federacion e la presentacion d’una lista XIII Units, sostenguda pel president Guasch (Dracs), Rives (ancian president de Sant Gaudenç), lo president de la Liga de Provença... Objectius: refortir lo Campionat, una politica en favor del XIII de França, la mesa en plaça d’una Copa de las Províncias...
 
La data de las eleccions federalas es pas fixada, mas lançan una crida per que se tengan al mai lèu per poder trabalhar sens esperar a la mesa en plaça del campionat 2016-17 e per obrar a una participacion bèla dels Blaus a la Copa del Mond 2017.
 
 
 
 
Alan Roch