Pas d’oitena victòria consecutiva pels Dragons
 
Del costat d’Hull FC, divendres de ser, los catalans coneguèron un retard a l’engatjament dins la partida, foguèron lèu menats 12-0. Al coratge, los Dragons tornavan a 20-14 a la pausa. Dins lo segond temps, un ensag anglés punissiá lo carton jaune de Casty e malgrat un ensag de Pelissièr, las darrièras dètz minutas se mostrèron esterilas e daissèron “Els Dragons” a dos punts dels angleses: 28-26. De notar que l’arbitre central refusèt una transformacion als catalans: un arbitre de tòca aviá levat la bandiereta e l’autre non!
 
Dijòus, Warrington aviá ganhat sens problèma la partida dels caps de fila contra Wigan: 40-10.
 
Divendres, la victòria d’Huddersfield sus Leeds 28-20 manda los campions a la darrièra plaça del classament. Widnes s’acostuma a la desfaita: batut sus sa pelena per Wakefield 18-16 e dimenge, Salford, penalizat de 6 punts al classament per aver tròp pagat sos jogaires, se torna faire lo moral fàcia a Hull KR: 44-26.
 
De soslinhar la bona forma dels U19 catalans en cap de classament amb 7 victòrias en 7 partidas e que ganhan largament a Londres: 42-18.
 
 
Un torn de Cup
 
La dimenjada qu’arriba veirà la dintrada en jòc e en Cup de las 8 formacions bèlas de Superliga: los catalans anaràn desfisar la formacion de Batley (Championship), mentre que Tolosa, qu’a batut Oxford 54-8 dissabte a Blanhac, se desplaçarà a Wakefield.
 
Son tanben al programa 3 partidas entre formacions de Superliga: Huddersfield e Leeds se tornaràn trapar una setmana aprèp la partida de campionat, Castleford-Salford e St Helens-Hull FC. Warrington rendrà vesita a Oldham, Wigan jogarà a Dewsbury e Widnes a Halifax.
 
 
NRL: 27400 èuros d’emenda
 
En Austràlia, 4 esquipas an ganhat sèt partidas sus las nòu jogadas: los campions Vaquièrs, los Broncos de Brisbane, la Tempèsta de Melbourne e las Làmias de Cronulla. Los Roosters puntan a l’avantdarrièra plaça e l’entraïnaire Trent Robinson prenguèt doas emendas de 20 000 dolars australians per aver mal parlat dels arbitres de terren e tanben d’aqueles de la vidèo aprèp la desfaita contra Sant Jòrdi 20-18. Aquò fa 27 400 èuros de sortir de la borsa: val mai saupre téner sa lenga!
 
Divendres, se jogarà la tradicionala partida de prima entre Austràlia e la Nòva Zelanda: l’ANZAC-test .
 
 
Campionat: rendètz-vos a Fois
 
Dissabte de vèspre, sus sa pelena del Molin, Lesinhan se joguèt de l’adversari catalan de Palau, 46-0, mentre qu’en Avinhon, los Dragonets s’empleguèron amb bonaür a contrar las volontats ofensivas dels provençals: 22-10.
 
Rendètz-vos aqueste dissabte de vèspre a l’estadi de Fois per las doas mièjas finalas: a doas oras del vèspre, lo dèrbi Limós-Lesinhan e a 4 oras l’oposicion màger entre Carcassona e Sant Estève XIII Catalan. Limós sembla melhor armat que la formacion de Corbièras. Los catalans en version “dragonizada” auràn benlèu mai de ritme que los carcassoneses qu’an pas jogat dempuèi 5 setmanas. Mas lo canari bolhís pas encara dins l’“ollada”!
 
Los dos venceires se traparàn lo dissabte 21 de mai sus la pelena de l’estadi municipal d’Albi.
 
 
XIII cadieral: una Copa per Vichèi
 
Se Caors se ganhèt en març la Copa de XIII cadieral de l’Elèit, una autra Copa èra en jòc aquesta dimenjada en tèrra d’Aude per 8 formacions del segond nivèl. Las partidas se debanèron dins las salas de Vilagalhenc e Puègnautièr. Los locals arribèron en finala, mas l’AE Carcassona pleguèt dins lo segond temps fàcia a la formacion mai experimentada de Vichèi: 38-14.

 
 
 
Alan Roch