Greenpeace en Olanda a publicat una seguida de documents sus la negociacion del Partenariat Transatlantic de Comèrci e Investiment que se negòcia entre Euròpa e los Estats Units (lo TTIP, segon sa sigla en anglés, e tanben conegut coma TAFTA). Los documents son publicats sul sit web www.ttip-leaks.org.
 
Segon aquelas informacions, la tòca dels Estats Units, d’un costat, seriá de cambiar las nòrmas de l’Union Europèa e los procèsses legislatius en de matèrias coma la santat o l’environament. E d’un autre costat, voldrián rebaissar los nivèls de las exigéncias comunautàrias per protegir los usatgièrs e consumaires dins aqueles domenis, çò rapòrta Vilaweb.
 
Los documents que Greenpeace Olanda a desvelats comprenon la mitat del tèxt del projècte amb la data d’abril de 2016; es lo tèxt del torn de las 13 negociacions entre Euròpa e los Estats Units. Los documents filtrats se forman de 248 paginas (13 capítols consolidats sul TTIP e mai una nòta entitolada “Estat tactic de las negociacions TTIP en març de 2016”).
 
Aqueles documents mòstran clarament las pressions dels Estats Units per fin que l’Union Europèa modifique cèrtas leis que la partida americana las considèra restrictivas tocant la proteccion dels consumaires e de l’environament.
 
Jürgen Knirsch, expèrt de Greenpeace en comèrci, afirma que i a un perilh que desaparesca lo principi preventiu en vigor fins ara en Euròpa, que permet solament de comercializar de produches qu’ajan demostrat que son pas dangieroses per la santat de las personas nimai per l’environament. Aquel principi poiriá èsser remplaçat pel principi de risc, en vigor als Estats Units. La preocupacion es que se cèrca de rebaissar las exigéncias suls requisits pels produches quimics, los pesticidas e los OGM, qu’an una regulacion europèa importanta. Un autre afar qu’inquieta es que se pòsca comercializar dins l’UE de carn tractada a las ormònas (çò qu’es acceptat als Estats Units) o d’aliments per animals fabricats amb de farinas d’origina animala.
 
L’Union Europèa regís un principi de precaucion, del temps que la legislacion estatsunidenca prioriza la comercializacion dels produches e solament retira los produches que lor nocivitat es estada demostrada a posteriòri. Mas lo principi de precaucion, consagrat dins lo Tractat de l’UE, se mençona pas dins lo document del TTIP. Per contra, si que se mençona dins divèrses capítols la demanda de la delegacion estatsunidenca de trabalhar sus un apròchi “basat sul risc”, ja en vigor als Estats Units.
 
Los documents fan davalar la proteccion de la seguretat dels consumaires e mai la proteccion del clima e de l’environament. Sembla que son eliminadas las politicas de proteccion environamentalas. Desapareis un principi basic consagrat dins l’acòrdi del GATT (devengut ara l’Organizacion Mondiala del Comèrci, l’OMC), de fa gaireben 70 ans, que disiá que los estats devon regular las nòrmas de comèrci “per protegir los èssers umans, la vida animala e vegetala o la santat” o ben per “la conservacion de las ressorsas naturalas non renovablas”. L’omission d’aquela nòrma suggerís que “las doas partidas crèan un acòrdi que situa lo profièch economic al dessús de la vida, de la santat e de l’environament”, segon Greenpeace.
 
Los documents fan pas cap de referéncia al tractat sul cambiament climatic signat a París en decembre passat, que sa tòca estrategica èra d’evitar un aument de temperatura superior de dos gras per rapòrt a l’epòca preïndustriala, e per tant, d’evitar una crisi climatica amb d’efièches desastroses per de milièrs de milions de personas. “Lo mond del comèrci se deuriá engatjar dins las accions que cal prene en defensa del clima”, segon Greenpeace. Mas los documents revelats dison pas res sus la proteccion del clima. Una donada significativa es que s’escarta que l’UE regule l’importacion dels combustibles mai nocius, coma lo petròli venent de la sabla bituminosa.
 
Tanben se dobrís la pòrta a un poder mai grand de las corporacions. Los documents revelats parlan mai d’un còp del besonh de nòvas consultas amb l’indústria e fan mençon explicita que los tèxtes son escriches amb las contribucions d’aqueles sectors. Per resòlver las possiblas disputas que se pòsca ocasionar entre las entrepresas e los govèrns dels dos costats de l’Atlantic, lo pache prevesiá al començament de resòlver lo conflicte amb un arbitratge tecnic per evitar los tribunals. Après de protèstes de ciutadanas, Brussèlas a prepausat un tribunal format de jutges; mas dins la version revelada del tèxt, i a pas cap referéncia al subjècte sus la posicion estatsunidenca, çò que fa incertana la viabilitat d’aquela proposicion.
 
 
 
<hr align="left" size="1" width="33%" />
Los documents son publicats sul sit web www.ttip-leaks.org.