Bandièra01 1180x150: Comuna de Tolosa

Actualitats

L’estat francés apròva uèi la reforma del còde del trabalh sens lo vòte del Parlament

Un conselh dels ministres autorizèt ièr lo govèrn Valls a recórrer a l’article 49.3 de la Constitucion francesa per adoptar la lei polemica

| Non au 49.3 ! Rassemblons nous devant l'Assemblée Nationale
L’estat francés apròva uèi la polemica reforma del trabalh sens lo vòte del Parlament, gràcias a l’estratagèma de l’article 49.3 de la Constitucion. Una reünion extraordinària del conselh dels ministres autorizèt ièr lo primièr ministre francés Manuel Valls a recórrer al 49.3. Aquel article permet al govèrn d’engatjar sa responsabilitat sus un projècte de lei. Se cap de mocion de censura es pas votada, lo tèxt es adoptat sens cap de formalitat. L’oposicion de drecha a ja anonciat qu’es lèsta per depausar una mocion de censura.
 
Aquel estratagèma foguèt ja emplegat pel govèrn Valls per aprovar la Lei de liberalizacion economica, coneguda coma Lei Macron.
 
 
La reforma del còde del trabalh
 
Dins la linha de çò que marca la tròica, aquela reforma ditz voler “protegir los salariats, favorir l’emplec e donar mai de marge de manòbra a la negociacion en entrepresa”. Dins la practica, manten la setmana de 35 oras, mas facilita los licenciaments, permet d’esperlongar la durada de la jornada de trabalh sens besonh d'acòrdi amb los trabalhadors, e permet de far demenir la remuneracion de las oras suplementàrias.
 
Los sindicats refusan quitament la nòva version que lo primièr ministre Manuel Valls presentèt lo 14 de març passat, en seguida de fòrça protèstas e d'una autra jornada de cauma generala que mobilizèt mai de 250 000 personas segon los principals mèdias. Aquela rescritura a pas convencut los sindicats: la CGT e l’UNÈF mantenon lor oposicion. En mai d’aquò, lo patronat, representat pel MEDÈF, qu’èra en favor del nòu projècte de lei, ara se ditz decebut.
 
Valls presentèt una version “corregida” de sa proposicion de lei, coneguda coma “Lei Trabalh” o “Lei El Khomri”, amb qualques cambiaments. Lo mai remarcable seriá que lo barèm que deu limitar las indemnitats per licenciament serà solament “indicatiu”.
 
 
De protèstas per tot l’estat francés
 
Las protèstas qu’a generat aquela reforma culminèron lo 31 de març en una cauma generala. A partir d’aquel moment, se quilhèt lo movement nomenat Nuèch de Pè (Nuit Debout), que dempuèi lo 31 de març ocupa la Plaça de la Republica de París, s’estend per tot l’estat francés e quitament a Brussèlas, Berlin, Madrid, Saragossa e qualques vilas dels Païses Catalans. L’iniciativa amassa de milièrs de joves que cada jorn arriban a las plaças amb los afars per campar e s’organizar en assembladas e comissions.
 
En Occitània lo movement es arribat almens a Avinhon, Bordèu, Clarmont, Lemòtges, lo Telh, Marselha, Montpelhièr, Niça, Nimes, Pau, Rodés, Tolosa, Tula, Valença e Vilafranca de Roergue.
 
La protèsta seguís la cauma generala del 31 de març passat per protestar contra la reforma del còde del trabalh, la dicha Lei El-Khomri, e aquela cauma se tenguèt jos la crida dels principals sindicats interprofessionals, de qualques organizacions d’estudiants e de fòrça collectius. Pasmens, los manifestants ocupan las plaças e i demòran de nuèch, dreches, de pè, tanben per protestar contra l’estat d’emergéncia e d’autras luchas socialas. Per tant, lo movement es vengut una convergéncia dels movements ecologistas, antimilitaristas e d’autres ciutadans malcontents e decebuts a causa de las politicas del govèrn de Manuel Valls; que denóncian quatre ans de mesuras liberalas e reclaman un cambiament.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
4.

e li disen democràcia.

  • 0
  • 0
manjacostel murèth
3.

Es una longa tradicion del PS de segar la branca ont es jocat . I son arribats . En rota fins al 5 del % coma al temps de G Deferre e de la SFIO. Òsca al PS per aver espetat l'esquèrre. D'un autre costat van poder s'aligar ambe lo PR , vist qu'es la meteissa politica. Achille Talon nos governa ambe l'ajuda d'un catalan garrèl e jacobin e d'un autre ambròsi, coat per la banca Ròtchild a saber lo Senher Micron. Visca la promocion Voltaire , de l'ENA (ASE occitan) e visca lo socialisme "financièr". Una vergonha per Jaurès que deu se revirar dins sa tomba ! Coma disia lo grand valon pas la cartocha! Cresi qu'aqueste còp aurem quitament pas drech a una Jospinada, que fa pas gaire , nos faguèron votar Chirac per sauvar . E vos pòdi dire qu'aqueste còp podon anar se far còser dos uòus....

  • 6
  • 0
Pirolet
2.

Saique lo 49.3 es pas un 6.35 medamne!
Aquò vòl pas dire que siague un afogat d'aquesta lei.

  • 0
  • 1
Ernèst Guevarra Jr. L'Avana
1.

L’estat francés apròva uèi la reforma del còde del trabalh sens lo vòte del Parlament. Lo governament es aficat a esquèrra, elegit per una linha politica d'esquèrra, e bota en plaça, e e mai en fòrça, mesuras politicas de dreita dura. Conclusion : lo governament francés es una dictatura de dreita. Socialistas o sociodemcrats ? Tot çò mai es sonque parlicadas e propaganda…

  • 12
  • 1

Escriu un comentari sus aqueste article