Las tressusors catalanas
 
Dissabte, los Dragons recebián los avantdarrièrs, los Gigants d’Huddersfield, mas: Baitieri e Taylor avián pres una partida de punicion aprèp lo rescontre de Cup, Duport se poguèt pas levar malaut lo dissabte de matin, Elima se faguèt operar del genolh dins la setmana e Myler, lo mesclanha, sortiguèt al cap d’un quart d’ora tocat als adductors. Los Gigants dobriguèron la marca sus penalitat e rajustèron un ensag transformat abans que Loís Anderson trauquèsse la defensa anglesa: 8-6 pels angleses a la pausa.
 
Un ensag d’Horo e un de Gigòt (transformat per Richards) permetián als catalans de prene un avantatge bèl: 16-8. Connors serpentejava dins la defensa catalana, 16-14, e demorava un quart d’ora de jòc. Los Sang e Aur capitèron a servar aquela marca e una victòria arrancada davant mai de 10 000 espectators.
 
En dobertura, la victòria novèla dels U19-Catalans fàcia a Huddersfield foguèt mai complicada que çò que ne ditz la marca finala: 39-26.
 
Los Dragons demòran segonds al classament a nautor de punts amb lo cap de fila Warrington batut a Wakefield 36-28 e amb Hull FC que ganha a Wigan 30-16.
 
St Helens, victoriós fàcia a Salford 34-20, ratrapa Wigan a la quatrena plaça.
 
Leeds es plan darrièr aprèp una novèla desfaita sus sa pelena contra Castleford: 12-52.
 
Plaça al rendètz-vos de la dimenjada magica a Newcastle: aquela jornada suplementària als anar-venir que vei las 12 formacions jogar sul meteis terren. Al programa de dissabte, Salford-Widnes, Warrington-Castleford, Leeds-Wigan; e dimenge, Catalans-Wakefield (14h, ora occitana), St Helens-Huddersfield e lo dèrbi entre las doas formacions d’Hull. Las sièis partidas son retransmesas per BeIn Sport.
 
 
NRL: los Lapinons mai fòrts que las Anguilas
 
En Austràlia, tres formacions menan lo classament: los Broncos de Brisbane, las Làmias de Cronulla e la Tempèsta de Melbourne (venceires 15-14 dels campions Vaquièrs). De notar, la victòria dels Lapinons a Paramatta: 22-20.
 
 
Rendètz-vos a Albi per la supremacia occitana
 
Vèspre dominical amb doas finalas al Molin de Lesinhan. Ferrals ganha la Copa Déjean (de la Federala) contra Entraigas: 45-31. Las doas formacions se tornaràn trapar dimenge 29 de mai a Carcassona pel bloquièr de campion de Nacionala 1 e la montada en Elèit 2.
 
E justament en Elèit 2, lo campion de l’an se ditz la Reula que bat l’Escura: 20-18.
 
E Albi serà lo luòc de rendètz-vos tretzista d’aqueste dissabte 21 de mai. A miègjorn e mièja, lo títol de campion dels juniors se jogarà entre Avinhon e Sant Estève-XIII Catalan.
 
Puèi a 3 oras, serà lo moment de la finala bèla d’Elèit 1 entre Carcassona e Limós. Los dos clubs e las doas vilas preparan coma cal lo rendètz-vos: mesa en plaça d’autocars, bandieròlas, fèstas previstas al retorn…
 
Carcassona acabèt en primièra posicion las doas fasas del campionat, mas una finala demòra una finala...
 
S’anatz pas a Albi (mas i a pas de rason pro fòrta que fariá qu’i anèssetz pas!), poiretz seguir la partida sus França 3 Sud e, en lenga nòstra sus Ràdio Lenga d’Òc Narbona (www.lengadoc.eu).
 
 
 
 
Alan Roch