Bandièra01 1180x150: Comuna de Tolosa

Actualitats

Manòsca: accion per revendicar lo mantenement dels corses d’occitan

L’ensenhament de l’occitan es menaçat dins qualques collègis e licèus de Provença, e d’Occitània tota

Iniciativa per Occitània, lo Felibritge, l’Institut d’Estudis Occitans, de professors e de liceans del Licèu Fèlix Esclangon de Manòsca protagonizèron ièr, dimars 31 de mai, una accion de protèsta en seguida de l’anóncia que los corses d’occitan seràn suprimits dins qualques collègis e licèus de Provença. En cridant los eslogans “Aicí aimam l’occitan” e “Lenga, cultura, país”, revendican “lo mantenement e desvolopament dei cors d’occitan ara menaçats”, e mai, “una ofèrta generalizada de cors d’occitan dins totei leis escòlas e dins totei lei domenis de formacion de la mairala a l’universitat”.
 
Durant lo rassemblament, se faguèt una representacion teatrala que mostrava la Republica Francesa empachant la liura expression de l’occitan, una mesa en scèna que foguèt aplaudida e aclamada pel public assistent al crit d’“Òsca Manòsca”, del temps que repetissián “Aicí aimam l’occitan”.
 
Èran sus plaça qualques mèdias coma La Provence,  Barcelona TV e Jornalet.
 
Aquela accion es la seguida d’una campanha per salvar los corses d’occitan dins los licèus e collègis de Manòsca, Aurenja, Chastèu Arnós, Cadenet, Cavalhon, Costelet, Tarascon… que lor supression es anonciada per la rintrada que ven. La peticion en linha a amassat ja a l’entorn de 860 signaturas.
 
 
L’ensenhament de l’occitan menaçat dins tot lo país
 
La reforma francesa dels collègis, prevista per la rintrada de 2016, prevei de marginalizar mai encara l’ensenhament de l’occitan e representa un pas enrèire quitament per rapòrt a la lei francesa de l’educacion de 2013.
 
En consequéncia d’aquela reforma s’anóncian d’atacas similaras contra l’occitan per tot lo país. Per exemple, cèrcan de suprimir l’occitan al Collègi Sant Maur de Pau (Bearn). En Peiregòrd, lo Collectiu dels Mespresats defend l’ensenhament de l’occitan mas sas demandas se tustan al refús del Conselh d’Estat.
 
Tanben, la Federacion dels Ensenhaires de Lenga e Cultura d’Òc (FÈLCO) se bat contra aquela reforma en participant a de nombrosas protèstas e en se reünissent amb los elegits. Dins aquel sens, per mostrar lor desacòrdi, e per demandar que l’ensenhament de las nòstras lengas se mantenga, e mai per que se melhore la precària situacion actuala, la FÈLCO a lançat una peticion publica al Ministèri francés de l’Educacion Estatala, qu’a atench mai de 6700 signaturas.
 

Manosque se mobilise pour la défense de l'Occitanper LaProvence

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
3.

Brava gent que defensa sa terra, sa lenga e sa senyera. Visca provença!

  • 12
  • 0
lo breton MOULA
2.

Osca ! Chal lutar ! Chal mostrar nostra determinacion !

  • 12
  • 0
socialisme e barbaria! viva las vacas!
1.

3 X ÒSCA!!!!
L'occitan qu'ei ua causa tròp seriosa tà la deishar au mitan culturau. Qu'avem besonh de sortir d'aqueth encastre barrat e de socializar l'arrevendicacion nosta!
En Biarn los politics croishits que son entrin de tirar lo pauc de sòs qu'aven, arren n'ei marcat dens la peira..

Occitan lenga oficiau! de TIRA!
Luta per carrèra!

  • 25
  • 0

Escriu un comentari sus aqueste article