Aquí una polida setmana de XIII que s’anóncia amb lo segond Estats d’Origina en Austràlia aqueste dimècres e los quarts de finala de la Cup per la dimenjada. Mas, en primièr, dedicarem aquesta cronica a la memòria de Jo Cox, la deputada anglesa assassinada del costat de Leeds e que fasiá partida del grop d’elegits que sostenon la Liga de Rugbi a Westminster.
 
 
En esperant los quarts de Cup
 
Los Dragons èran partits a Warrington amb una esquipa jove e unes jogaires qu’èran pas a lor plaça costumièra: Casty en segonda linha, Richards al centre. La partida se joguèt sus unes detalhs e la victòria causiguèt lo camp anglés: 20-18. Es pecat pels dos punts de la victòria, mas es la confirmacion de la dinamica catalana.
 
Dijòus, Wigan ganhèt una partida tristoneta (aquò arriba!) a Widnes: 7-0. Divendres, Leeds anèt ganhar 32-6 a Wakefield, Saint Helens dominèt Hull KR, 48-16, e un tombat de Brough balhèt la victòria a Huddersfield cò de Salford, 31-30 http://www.rugby-league.com/superleague/match_report/12307 . Dimenge, manquèron de tustaires a Castleford per batre lo cap de fila Hull FC, 22-24, amb quatre transformacions mancadas!
 
E ara, plaça als quarts de Cup! Los Dracs devon afrontar un talhon: Hull FC e sus la pelena dels caps de fila, aqueste dissabte en debuta de vèspre (14h30, ora occitana).
 
Son tanben al programa: Huddersfield-Wakefield, dijòus; Warrington-Widnes, divendres; Wigan-Castleford, dissabte en fin de vèspre. De notar que Be In Sports retransmetrà las quatre partidas en dirècte.
 
 
Tolosa cartona
 
En Liga Una, novèla victòria bèla del Tolosa Olimpic aqueste dissabte a Blanhac: 84-6 fàcia a Keighley e la perseguida de l’espròva en cap de fila a quatre jornadas de la fin de la primièra fasa.
 
 
Un dimècres a Brisbane
 
Aqueste dimècres a Brisbane se debanarà lo segond afrontament dels Estats d’Origina, amb doas esquipas qu’an solament una modificacion dins la composicion. Queensland voldrà confirmar sa victòria (6-4) de fa tres setmanas e ganhar la tièra 2016, mas cal pas comptar amb la Nòva Galas del Sud per se daissar faire (a miègjorn, sus Be In Sport 3).
 
En campionat, unas esquipas an un torn de pausa e d’autras jògan sens los seleccionats pel rescontre de Brisbane. Atal, lo cap de fila Melbourne pèrd cò dels Dragons de Sant Jòrdi 20-10. Los Lapinons coneisson una novèla desfaita fàcia a Paramatta, 12-30, e los NZ-Combatents baton los Poletons, 12-10, mercé a tres penalitats d’Isaac Luke.
 
 
D’aquel temps...
 
D’aquel temps, a Carcassona, dissabte de vèspre, una partida amicala ramosèt totes los amics del pilar Tyrone Pau que plega lo malhòt a 39 ans, aprèp aver portat las colors de Limós e de Carcassona. Un grand moment festiu e esportiu, jol signe de l’amistat.
 
La campanha electorala bat son plen abans las eleccions del 2 de julh a la direccion de la Federacion. La lista alternativa XIII-Units de Marc Palanques multiplica los acamps informatius al prèp dels comitats per presentar sos projèctes novators. Coneis un bon acuèlh, mas i a pas de sondatges per balhar d’indicas sus un vòte important pel devenir del XIII en cò nòstre.
 
 
 
 
Alan Roch