Per d’unes, la debuta de julh significa las vacanças. Es pas lo cas pel mond tretzista aqueste dissabte 2 de julh amb los 10 ans dels Dracs en Superliga a Brutus, una partida decisiva a Blanhac per Tolosa en Liga Una e las eleccions a la Federacion!
 
 
Cup: Decepcion catalana
 
Aqueste dissabte, sus una pelena absenta en rason de refeccion, los Dracs an pas pogut resistir pel tresen còp de l’an a Hull FC. La linha de tres quarts èra privada de Gigòt, suspendut, e comptava amb lo retorn d’Austràlia de Benjamin Garcia. Los Angleses se mostrèron mai realistas e venquèron 22-8.
 
Los autres quarts vegèron dijòus la victòria de Wakefield a Huddersfield, 28-16; puèi, divendres la qualificacion 20-18 de Warrington fàcia a Widnes; e dissabte, Wigan escartèt Castleford 26-12.
 
Lo tiratge de las mièjas finalas a balhat las oposicions Wigan-Hull FC lo divendres 29 de julh a Doncaster e Warrington-Wakefield lo dissabte 30 de julh a Leigh.
 
 
10 ans en Superliga
 
Aqueste dissabte 2 de julh, los dirigents dels Dragons an decidit de marcar la preséncia de la formacion catalana en Superliga dempuèi 10 ans, lo jorn de la partida contra Wigan que foguèt lo primièr a venir jogar (e se faire batre) a Perpinhan l’ivèrn de 2006.
 
Tre dijòus, un vilatge-rugbi se tendrà al Castellet. Dijòus, de ser, de partidas de rugbi a tocar dos contra dos. Divendres, una jornada pels escolans e en serada un torneg intercafès.
 
Dissabte, al benefici de l’ADÒT (associacion pels dons d’organs), se farà la trasmission de la palma de la partida d’Illa de Tet, ont nasquèt Joan Galià, a Brutus: 40 quilomètres de man en man, una passa de primièra, totjorn enrèire mas “sempre endavant!”!
 
La partida (a 6 oras del vèspre a Brutus) serà seguida de la Nuèit dels 10 ans al Pargue de las Exposicions amb la participacion de 5000 personas e la venguda dels jogaires que marquèron aquelas annadas, per la designacion de l’esquipa dels 10 ans....
 
 
Queensland es lo mèstre
 
Dimècres, lo Suncorp de Brisbane aviá pas mai una plaça de liura per veire la segonda oposicion dels Estats d’Origina de l’an. Los jogaires locals confirmèron largament lor victòria de la primièra partida sus la Nòva Galas del Sud: 26-16 dins un rescontre mai dobèrt que vegèt l’alièr Dane Gagai plantar tres ensages.
 
 
Championship en vista
 
En Liga Una, Tolosa a fait un bon viatge al País de Galas amb una victòria 32-14 suls Crusaders e demòra cap de fila de la competicion. Dissabte, a Blanhac, a 18h30 , partida decisiva fàcia a York (lo segond) per considerar de mai en mai seriosament la montada dirècta en Championship per la sason venenta.
 
 
Las eleccions
 
Plan sarrada s’anóncia la marca de las eleccions federalas aqueste dissabte 2 de julh, de matin, a Tolosa, entre los sortents de XIII en Marcha del president Zalduendo e l’alternativa dinamica de XIII Units prepausada per la còla de Marc Palanques.
 
 
 
 
Alan Roch