Bandièra01 1180x150: Comuna de Tolosa

Actualitats

Rugbi de XIII: la victòria fugís los Catalans

La crotz mondina es plan presenta sus las afichas del Tolosa Olimpic
La crotz mondina es plan presenta sus las afichas del Tolosa Olimpic
D’aquesta passa, quand se parla d’una partida dels Dragons catalans, òm se pensa d’escriure la meteissa cronica tristoneta.
 
 
Tornar far nàisser l’espèr en tèrra viking?
 
Aqueste dissabte, los Dragons recebián a Brutus los Gats-Fèrs de Wakefield amb un grop encara modificat: onze jogaires a l’infirmariá!
 
Encaissèron un ensag d’entrada mas repliquèron tres còps per Gigot, Taylor e Horo. Aquí, amb unes doblits defensius, dobriguèron las pòrtas a l’egalizacion anglesa e, coma sus la còrna, lo còrs arbitral refusèt un ensag a Yahà, la pausa arriba sus una egalitat 18-18.
 
Los angleses prenián l’avantatge tre la represa, mas Lucàs Albèrt distillava una passa al pè a Morgan Escarré a l’ora de jòc (24-24). Novèl ensag transformat anglés, Foad Yaha replicava mas… la transformacion èra mancada per Richards (o refusada pels arbitres?). Planchòt final: 30-28 pels angleses.
 
Los catalans se fan ratrapar al classament per St-Helens, ganhaire a Huddersfield (34-18), mas gardan un avantatge bèl a la diferéncia de punts: + 116 contra + 18. Se Wigan bat Sant-Helens dijòus al ser, los Catalans acabaràn la primièra fasa quatrens (levat, ipotèsi improbabla, se prenon mai de 100 punts!). Se St-Helens pèrd pas, la victòria vendrà imperativa a Widnes dimenge que ven per assegurar una segonda fasa amb quatre recepcions a Brutus.
 
Tresena victòria sens pietat d’Hull-FC sus son vesin Hull-KR 36-12; Leeds fa plegar Wigan 18-16 e Salford va ganhar a Widnes 32-24, alara que Warrington passa un 42-26 a Castleford.
 
 
Los Uèit del Mitan
 
Aquesta dimenjada, se jogava la darrièra jornada del Championship. Se sap atal las quatre esquipas que jogaràn la competicion dels Uèit del Mitan contra los 4 darrièrs de Super-Liga (Salfòrd, Hull-KR, Huddersfield e Leeds). Pòdon noirir l’espèr de montar en Super-Liga la sason venenta: Leigh, Londres, Batley e Bradford. Las uèit formacions se rescontran un sol còp. Los 3 primièrs jogaràn en Super-Liga l’an que ven. Partida de barratge entre lo quatren e lo cinquen per la dotzena plaça dins la competicion maja.
 
 
Tolosa en rota pel Championship?
 
Aqueste dissabte 23 de julh, a 6 e mièja del vèspre, sus l’estadi de Blanhac, lo Tolosa Olimpic entamenarà la segonda fasa del campionat de Liga Una en posicion de cap de fila amb la recepcion dels Keighley Cougars e amb la perspectiva de passar a l’escalon superior tre l’an que ven.
 
 
Los Blaus per l’onor
 
Dimècres passat, a Sydney, calguèt esperar la darrièra minuta e un ensag del centre Jennings per conéisser los venceires de la tresena partida dels Estats d’Origina: la Novèla Galas del sud bat Queensland 18-14 , mas son los Marrons que ganhan la tièra 2016: doas victòrias a una.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lino
1.

Qu'es aquò la crotz mondina ? ... volètz parlar de la crotz occitana ?

  • 1
  • 0

Escriu un comentari sus aqueste article