Bandièra01 capçalera  1180x150: Botiga

Actualitats

crotz-tolosaCreated with Sketch.Comtat de NiçaCostiera Niçarda

Atemptat de Niça: lo govèrn francés fa una enquèsta per determinar se i aguèt d’errors de la seguretat

L’Inspeccion Generala de la Polícia Nacionala farà una “avaloracion tecnica” del dispositiu per que se pòsca evitar d’especulacions e de “polemicas inutilas”

Lo govèrn francés a ordenat la dobertura d’una enquèsta per determinar s’i aguèt d’errors de las fòrças de seguretat qu'aguèsson pogut facilitar l’atac del 14 de julhet passat a Niça, que son resultat foguèt un chaple amb un trist bilanç de 84 personas mòrtas e aperaquí dos centenats de ferits.
 
Lo ministre de l’interior francés, Bernard Cazeneuve, a anonciat dins un comunicat que l’Inspeccion Generala de la Polícia Nacionala farà una “avaloracion tecnica” del dispositiu desplegat lo 14 de julhet a Niça, per que se pòsca evitar d’especulacions e de “polemicas inutilas”.
 
L’executiu a explicat que s’agís d’una enquèsta “administrativa”, çò qu’exclutz pas en cap de cas d’enquèstas judiciàrias futuras. “S’inscriu dins una manòbra de transparéncia e de vertat per las victimas e lors familhas”, çò apond lo ministèri de l’interiora dins son tèxt.
 
L’anóncia es arribada una setmana après que Mohammad Lahouaiej Bouhlel se roncèt amb un camion sus la molonada amassada sul Camin dels Angleses. La facilitat qu’introdusiguèt lo veïcul dins un airal restrench a la circulacion, e lo temps percorregut fins a son intercepcion an remés en causa l’accion de las fòrças de seguretat.
 
 
Libération denóncia de mancas de seguretat
 
Las autoritats, tant estatalas coma localas, an evitat de criticar lo desplegament de la polícia, mas una enquèsta publicada per Libération a mes en causa la version oficiala. Segon los testimònis e los imatges de l’eveniment, s'èra pas cobèrt de manièra adaptada lo perimètre d’aquela carrièra pedonièra.
 
Una font policèra mençonada per Libération e qu’a vist los imatges de las camèras de seguretat a constatat que i aviá solament un veïcul de la polícia, amb d’agents municipals, que blocava l’accès al Camin dels Angleses.
 
Ça que la, lo dispositiu èra aquel decidit après una tièra de reünions tengudas a la fin de junh e al començament de julhet, presididas per la prefectura del departament dels Alps Maritims. L’acòrdi establissiá lo desplegament de 42 agents, 16 mai qu’en 2015, dins un vintenat de ponches d’accès.
 
Lo dispositiu final foguèt exactament aquel previst, mas inferior a aquel descrich après pel govèrn estatal e per la prefectura, segon Libération, qu’a pas pogut determinar s’un desplegament refortit auriá cambiat quicòm, ça que la.



La justícia demanda de destruire d’imatges
 
D’un autre costat, la justícia francesa a demandat a la comuna de Niça de destruire 24 oras d’imatges. Segon Le Figaro, una requisicion judiciària urgenta foguèt enviada dimècres passat al centre de supervision urban de Niça. Segon lo ministèri public, se cèrca “d'evitar la difusion non contrarotlada d’aqueles imatges”. 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article