Bandièra01 1180x150: Comuna de Tolosa

Actualitats

Rugbi de XIII: un divendres “Sant” pels Dragons?

Ne sèm a las causas seriosas en Super-Liga amb lo Super-8 e sas primièras jornadas

Los catalans jògan lor sòmi aqueste divendres 12 d’agost a St-Helens
Los catalans jògan lor sòmi aqueste divendres 12 d’agost a St-Helens
Yaha marca tres còps
 
Per la primièra jornada de Super-8, tre dijòus, St-Helens metiá la pression suls Dragons en anent ganhar a Warrington: 20-18. Autra suspresa divendres amb la victòria de Castleford a Hull-FC: 30-16 alara que Wigan èra sens pietat per Wakefield: 60-12.
 
La victòria veniá imperativa dissabte pels Dragons per se trapar pas amb 4 punts de retard sus St-Helens. De jogaires dintravan (Monis, Aiton, Bòsc, Anderson) per tornar balhar vam a una formacion en plen dobte.
 
Widnes faguèt pas lo pes: Broughton marquèt aprèp 90 mètres de corsa, Horo fasiá pròva d’oportunisme (10-6 a la pausa), puèi Yaha signava tres ensages: sus una passa a pè de Bòsc e sus doas liberacions de palma de son centre Vincenç Duport (que ven de signar per doas novèlas sasons jol malhòt sang e aur). Victòria: 26-10, amb un punt negre: la nafradura al ginolh de Tomàs Bòsc.
 
Divendres, los Dragons aniràn a St-Helens per ganhar: aquò lor i permetriá de tornar trapar la quatrena plaça qualificativa per las mièjas finalas. En cas de desfaita, aquela qualificacion virariá al sòmi sus fons d’una decepcion grandarassa. Alara, divendres al ser, digatz-vos que i a pas solament los Jòcs Olimpics dins la vida e que poiriatz gitar un uèlh sus la retransmission de la partida sus BeInSport.
 
 
8 del Mitan: Leeds cartona.
 
Dins los 8 del mitan, per designar 4 formacions que jogaràn en Super-Liga la sason venenta, la diferéncia entre primièr e segond nivèl se nòta per las victòrias de Leeds a Featherstone 62-6 e de Hull-KR sus Batley 58-18. Dins las autras doas partidas, Salfòrd bat los Gigants d’Huddersfield 34-12 e Leigh ganha contra Londres 34-30.
 
 
Tolosa a Doncaster
 
Aqueste dimenge 14, en Liga-Una, lo Tolosa Olimpic voldrà contunhar sa tièra de victòrias del costat de Doncaster abans de reçaupre a Blanhac lo dissabte 20 los jogaires de Rochdale, los sols qu’an pas perdut fàcia als occitans (28-28 marca finala del primièr rescontre).
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article