Bandièra01 1180x150: Comuna de Tolosa

Actualitats

Rugbi de XIII: Waterloo a St-Helens pels Dragons

Aquesta mitat d’agost es pas brica gaujosa per las ambicions dels Dragons catalans

Dave Taylor dobriguèt la marca, mas apuèi
Dave Taylor dobriguèt la marca, mas apuèi | Dragons Catalans
La fin dels espèrs de la prima
 
Los sang e aur jogavan una partida capitala divendres a St-Helens per demorar dins la corsa a la qualificacion per las mièjas finalas de Super-Liga. Dave Taylor dobrissiá la marca tre la 7a minuta, mas Adam Swift marcava dos còps e los Catalans perdián l’alièr Brougton nafrat tre la vintena minuta. En superioritat numerica en fin de mièg temps, Baitieri (transformacion de Lucàs Albèrt) tornava balhar l’avantage als Catalans, mas sus la còrna Adam Swift marcava encara e St-Helens menava 16-12.
 
A la represa, lo mèstre de jogar Carney tornava pas (trigoçava la camba dempuèi bèl brieu) e Justin Horo sortiriá a l’ora de jòc. Èra tròp pels catalans que vesián los ngleses s’envolar (39-16) e lor levar las illusions de qualificacion. Cossí remontar quatre punts de retard? Se pòt tojorn i creire e somiar, mas aquò sembla plan impossible. D’aitant mai, qu’amb un efectiu redusit, los Catalans seràn tre aqueste dijòus cò del cap de fila, lor bèstia negra d’Hull-FC.
 
Un cap de fila qu’es en forma: victòria 38-0 a Widnes, alara que son segond Warrington ganha a Wakefield 38-10 e que lo tresen Wigan se fa batre a Castleford (36-22) que torna a 3 punts dels Dragons per la cinquena plaça.
 
 
Las pretensions de Leigh
 
Dins los 8 del Mitan, los Centurions de Leigh afirman lor pretension a la montada en Super-Liga en batent Salfòrd: 32-26. Leeds signa una segonda victòria: 22-18 sus Hull-KR. Las autras doas partidas foguèron desequilibradas amb las victòrias d’Huddersfield (62-16 contra Featherstone) e dels London Broncos (76-16 fàcia a Batley).
 
 
Tolosa ganha encara e encara
 
D’aquel temps en Liga-Una, lo Tolosa-Olimpic contunha sa cordelada de victòrias en l’emportant 38-18 cò de Doncaster. Aqueste dissabte 20 d’agost, a Blanhac (18h) , Tolosa reçauprà son segond Rochdale per s’assegurar la partida de montada a domicili.
 
 
NRL: La batèsta per las pelhòfas contunha
 
En Australia, se Melborna, las Làmias, los Dògols e Canberra seràn en pelhòfas, la batèsta contunha amb una granda intensitat per las autras quatre plaças qualificativas entre los Vaquièrs (batuts 22-10 pels Poletons), Brisbana (que se rassegura en batent Paramatta 38-16), Penrith (que ganha cò dels darrièrs 42-6), la Còsta d’Aur (que bat los Tigres 19-18), los Combatents NZ (que se fan susprendre pels Lapinons 22-41) e los Tigres. De notar que las formacions qu’an pas res mai a ganhar jògan lo jòc d'a fons. Es un exemple bèl de l’estat d’esperit australian.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article