Aquesta dimenjada, las equipas d’elèit avián un temps de pausa. L’actualitat se focaliza doncas sus las partidas internacionalas e sus la represa cò dels Dracs.
 
 
Los Cangorós naturalament
 
Italia serà la seisena seleccion europèa a prene part a la Copa del Mond de 2017 (amb Anglatèrra, Escòcia, Galas, Irlanda e los Blaus). Dins la partida de barratge jogada a Leigh divendres, los italians an pas fait dins lo detalh mercé a lor colònia italoaustraliana: victòria 76-0 sus Russia.
 
Dissabte, Coventry recebiá las doas partidas de la segonda jornada del Four Nations. Sens suspresa, Anglatèrra ganhèt fàcia a Escòcia: 38-12, mas son los escoceses que marquèron los primièrs e que menavan 8-0 a la 25a minuta. De senhalar los dos ensages de l’èx-Dragon Eloi Whitehead.
 
Puèi, Austràlia marquèt dos còps dins lo primièr quart d’ora. A la represa, los neozelandeses marcavan un ensag, mas Thurston passava doas penalitats. Una inspiracion de Johnson menava a un ensag de Rapana, mas èra tròp tard per contestar la victòria australiana: 14-8.
 
Lo tresen torn veirà las oposicions Nòva Zelanda-Escòcia (divendres de ser) e Austràlia-Anglatèrra (dimenge a 3 oras del vèspre; ora occitana). Per anar a Liverpool en finala lo 20, los angleses son dins l’obligacion de batre los australians. Una taca que demòra mai que probable ensús de lors mejans.
 
 
L’ora de la dintrada pels Dragons
 
Diluns 14 de novembre, los Dragons catalans tornaràn trapar la pelena per entamenar la preparacion de la sason novèla de Superliga. L’efectiu a plan cambiat: gaireben una esquipa a daissat las colors sang e aur. Grèg Mounis e Pat Richards arrèstan de jogar, Eloi Pelissièr, Antòni Maria e Glenn Stewart portaràn las colors de Leigh, Morgan Escarré e Romain Navarette seràn a Wigan, Todd Carney e Dave Taylor cèrcan de jogar en Euròpa o en NRL, Elima portarà lo malhòt de Palau, Stan Robin jogarà en Championship amb Tolosa.
 
Laurenç Fraissinós serà totjorn l’entraïnaire de la formacion. Lo president Guasch a fait apèl a l’ancian pilar dels Dragons Alex Chan coma director esportiu. Una novèl grop a l’entorn de l’australian Rodney Howe serà en carga de la preparacion fisica. L’emblematic Greg Bird torna per tres ans, l’un dels quatre Burgess (Luke) rejonh los catalans qu’an tanben fait signar lo pilar internacional Kiwi dels Roosters Sam Moa, lo menaire del jòc australian de St Helens Luke Walsh, lo centre d’Hull-KR Iain Thornley. Caldrà ajustar la signatura d’un primièr contracte professional per joves dels U-19 coma lo talonaire Alrix Da Costa.
 
 
Una jornada d’elèit trocejada en tres…
 
Al programa de la seisena jornada del campionat d’Elèit 1:
   
En Elèit 2, un prometedor Vilagalhenc-Argon contra Baó se jogarà dissabte de vèspre en Cabardés.
 
 
 
 
Alan Roch