Bandièra01 1180x150: Comuna de Tolosa

Actualitats

Rugbi de XIII: amb la prima, lo XIII es magic!

Aficha de la Dimenjada Magica (29 e 30 d’abril, a Carcassona)
Aficha de la Dimenjada Magica (29 e 30 d’abril, a Carcassona)

Vaquí vengut en país d’Òc e en Catalonha Nòrd, lo temps bèl de las partidas eliminatòrias, mas abans caldrà passar per la Dimenjada Magica d’aquesta fin de setmana a Carcassona: 400 minutas de XIII a se n’assadolar!


Finala audenca per la Copa
 
Lo dimenge 7 de mai de vèspre, las formacions de Lesinhan e de Carcassona se traparàn sus la pelena del Pargue dels Espòrts d’Avinhon amb l’enveja de tornar en çò lor la Copa Lòrd-Derby.
 
Aqueste dissabte, en mièja finala, al Molin, Limós marquèt tre la primièra minuta mas, lèu-fait, la partida lor i escapèt: 34-12 per Lesinhan a la pausa e 40-20 sus la còrna finala. A doas minutas de la fin, lo FCL a perdut son davant Papali sus un carton roge un pauc piòt: dintrèt sus la pelena alara que lo jogaire que deviá remplaçar èra pas sortit!
 
A Domèc, Albi entamenèt la partida sens complèxe e marquèt dos còps. Carcassona tornèt a egalitat, mas un còp de pè contrat a la darrièra segonda balhava l’avantatge als Tigres a la pausa: 18-12. Dins lo segond temps, Carcassona fasiá parlar sa poissança e utilizava melhor sos arguments ofensius per l’emportar: 38-26. Lo dobertura Gressèque passèt las 6 transformacions e ajustèt dos tombats.
 
 
Una brava Dimenjada Magica
 
La Federacion novèla a decidit de clavar la fasa de classament d’Elèit 1 per una segonda Dimenjada Magica que se farà arrapar las 10 formacions de la competicion segon lor classament. Las 5 partidas se tendràn a l’estadi Domèc a Carcassona, aquesta dimenjada dels 29 e 30 d’abril.
 
Al programa: lo dissabte, a 2 oras del vèspre: Vilanòva (7n)-St Gaudenç (8n); a 4 oras: Avinhon (5n)-Albi (6n); a 6 oras: Lesinhan (1r)-Limós (2d).
 
Lo dimenge, se jogaràn a 2 oras del vèspre Palau (9n)-Tolosa Bròncos (10n) e a 4 oras, Carcassona (3n)-Dragonets (4n). Aquesta darrièra partida serà importanta per determinar l’òrdre dels barratges de las pelhòfas.
 
Una brava taulejada es prevista per la Federacion lo dissabte de ser: ensalada de la mar, magret de tiron e patanas, formatges, doçors e vins d’Aude!
 
 
Wigan tròp fòrts pels Dracs
 
Es amb una formacion pertocada per las nafraduras que los Dragons se presentèron aqueste dimenge de vèspre a Wigan. Los catalans se faguèron susprene e menar 16-0. Trapèron lo biais de tornar a egalitat abans la pausa e, quitament, a prene l’avantatge abans l’òra de jòc: 22-20. Mas lo còr sufiguèt pas: la fin de partida foguèt del tot al tot a l’avantatge dels campions que l’empòrtan 42-22. Dimenge que ven, los catalans aniràn desfisar Wakefield e ensajaràn de prene lo revenge de lor pietadosa desfaita a Brutus (38-18). Los Dragons clavan en seisena posicion la fasa anar de la primièra part de la competicion.
 
Divendres, Widnes batèt Saint Helens: 16-14. Dissabte, Warrington capitèt de gardar dos punts d’avança sus Wakefield: 22-20 e dimenge, Hull-FC faguèt plegar lo cap de fila Castleford: 26-24.
 
Las autras 4 formacions jogavan los 16s de la Cup: Leeds coneguèt gaire de dificultats per batre Doncaster 64-28. Foguèt mai complicat per Salford, venceire de Toronto: 29-22. Leigh se fa eliminar per Hull-KR: 10-23 e Huddersfield plega fàcia als Lions de Swinton: 28-24. Los Dragons dintraràn dins la competicion la dimenjada dels 13 e 14 de mai.
 
Dissabte, en Championship, lo Tolosa Olimpic reçauprà Bradford a Blanhac (18h).
 
Pichona victòria mediatica pels Dragons: un article de 6 paginas dins lo n° del 22 d’abril de L’Équipe-Magazine.
 
 
Costat NRL
 
Costat campionat australian, notarem la corta victòria dels Bròncos de Brisbane cò dels Lapinons: 25-24; la victòria de Manly cò dels Raiders 20-18 al punt en aur e la desfaita sus lor pelena dels campions, las Làmias, fàcia als Titans: 12-16.
 
 
 
 
Alan Roch

 
abonar los amics de Jornalet
 




 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article