Bandièra01 1180x150: Comuna de Tolosa

Actualitats

Lo papa Francés aterrarà deman en Egipte al mièg de la tension a causa dels atemptats recents

Lo pontife anarà del 28 al 29 d'abril al Caire dins un ambient tendut a causa dels atemptats del 9 d’abril contra la comunautat còpta, que tuèron 44 personas

| Gabriel Sozzi
Lo papa Francés arribarà deman al Caire (Egipte) ont i demorarà fins al 29 d’abril, dins un ambient tendut a causa dels atemptats del 9 d’abril passat contra la comunautat còpta. Foguèron revendicats per l’autoproclamat Estat Islamic, e tuèron 44 personas.
 
Lo pontife va al Caire convidat pel president de la Republica, lo Grand Imam de la mosqueta d’Al Azhar Sheikh Muhammad Al Tayyib, los evesques de la Glèisa Catolica, e lo papa de la Glèisa Còpta, Teodòr II, qu’oficiava per la messa de Rams dins un dels atemptats, mas que foguèt pas nafrat.
 
S'agís del segond còp qu'un papa aurà calcat la tèrra egipciana. Lo primièr foguèt Joan Pau II en l’an 2000, dins l’encastre d’una peregrinacion jubilària.
 
 
Ajuda al dialòg e de vam pels còptes
 
Après los atemptats, lo papa mostrèt sa dolor. Puèi, dins una recepcion a la comunautat franciscana, lor precisèt sa decision de cancelar pas lo viatge. “Lo papa se barra pas davant çò qu'es passat, mas es amb granda fermetat e conviccion que partís devèrs Egipte per confirmar e ajudar al dialòg e a la comunion de la vida crestiana”, çò soslinhèt lo ministre general de l’Òrdre Franciscan dels Fraires Menors Conventuals, Marco Tasca.
 
De son costat, l'evesque còptocatolic d’Ismayliah, Makarios Tewfik, precisèt a Ràdio Vaticana que “sens cap de dobte, aquela vesita es un nòu pas de dobertura devèrs los fraires musulmans” e, a l'encòp, “una estimulacion per la Glèisa Ortodòxa Còpta que patís lo martiri amb tant d’eveniments darrièrament”.
 
Entre las pregàrias de la messa qu’aurà luòc dissabte que ven, se’n farà una en francés “per totas las victimas de la violéncia e del terrorisme dins lo Mond”, e especialament, “pels martirs d’Egipte”, e se pregarà tanben “pels emigrants e refugiats qu'an agut d’abandonar lors païses a causa de la guèrra”.


 
abonar los amics de Jornalet
 



 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma
1.

Bon viatge a Egipte de lo Papa, en defensa dels catòlics Coptas assassinats pels integristas carabassots ignorants.

  • 3
  • 0

Escriu un comentari sus aqueste article