Aprèp la Dimenjada Magica, vaquí, aqueste dimenge 7 de mai, un autre rendètz-vos bèl pel XIII occitan: la finala de la Copa entre Lesinhan e Carcassona a Avinhon, sus fons de novèla decepcion del costat dels Dragons e d’optimisme pel Tolosa Olimpic e, tanben, de projeccion sus la sason venenta amb las anóncias de la Federacion sus l’organizacion avenidoira de las competicions.
 
 
Festenal ofensiu per la Dimenjada Magica
 
Las partidas de la Dimenjada magica balhèron a veire una profusion d’ensages als espectators. Dissabte, St Gaudenç s’impausèt fàcia a Vilanòva: 42-12. La partida foguèt equilibrada dins lo primièr temps entre Avinhon e Albi abans que los provençals s’escapèssen 64-28. Pel primièr còp de la sason, calguèt passar pel punt en aur per veire una novèla victòria de Lesinhan sus Limós: 38-36.
 
Dimenge, Palau acabèt la sason sus una victòria fàcia a Tolosa: 49-16; la partida la mai disputada, vist que la tresena plaça èra en jòc, virèt a l’avantatge dels U23 catalans suls locals de Carcassona: 35-24.
 
En barratge, dins 15 jorns, los catalans reçaupràn Albi e Carcassona reçauprà Avinhon.
 
La Dimenjada Magica foguèt l’escasença d’un rescontre entre los dirigents dels clubs d’elèit e d’una conferéncia de premsa del president de la Federacion. Marc Palanques anoncièt que lo campionat 2017-2018 d’Elèit 1 se debanariá de genièr a julhet amb doas Dimenjadas Magicas (l’una en debuta de competicion; l’autra als tres quarts). Lo campionat d’Elèit 2 se dobrirà amb 2 polas geograficas de 6 clubs. Per preparar lo XIII de França a la Copa del Monde, se tendrà un inedit França-Jamaïca lo divendres 13 d’octobre a Perpinhan.
 
 
Finala de la Copa entre Carcassona e Lesinhan
 
Aqueste dimenge 7 de mai, lo Pargue dels Espòrts d’Avinhon serà l’encastre de las finalas de las Copas dels juniors entre Tolosa e Avinhon e de la Copa Lord-Derby entre Carcassona e Lesinhan. Los Singlars de Corbièras an las favors dels pronostics amb una formacion mai completa. Los Canaris deuràn ramosar totas lors fòrças e lor saber-jogar per contrar la maquina verd e blanc. De notar que s’anatz pas a Avinhon (mas seriá plan damatge), poiretz seguir la partida a la television sus France-O (!).
 
 
Lo Tolosa Olimpic cartona
 
— En Championship, dissabte a Blanhac, lo Tolosa Olimpic faguèt pas de detalhs fàcia a Bradford: larga victòria 60-4. Los tolosans s’installan en segonda posicion al classament e son mai que jamai en corsa per èsser presents dins la pola per la montada en Superliga. Dimenge, los Blaus e Blancs aniràn jogar cò dels Lions de Swinton.
 Autra victòria tolosana: en XIII Cadieral, lo títol reven a la formacion de Sant Jòri que bat los Dragons catalans: 52-34. Remembrarem que la Copa del Monde de XIII-Cadieral se tendrà a la fin de julh en Occitània e Catalonha.
 
 
Superliga: Los Gats Fèrs son vertadièrament… fèrs!
 
Aqueste dimenge, los Dragons anèron jogar a Wakefield amb, pel cap, una enveja de revenge aprèp la desfaita pietadosa a Brutus fa una mesada contra los Gats Fèrs. Bird e Inu èran de retorn dins la formacion, mas 80 minutas e tres cartons jaunes mai tard, los Dragons tenguèron pas la distància e pleguèron un còp de mai: 30-10. Pas lo temps de bufar e una novèla crida a la remobilizacion per la recepcion de Leeds aqueste dissabte 6 de mai a Brutus. De Rinocèros batuts sus lor pelena per Huddersfield: 31-12.
 
Wigan toquèt pas tèrra a Castleford: desfaita 54-4; St Helens s’impausèt fàcia a Leigh 28-6 e Hull-FC fàcia a Warrington: 34-10. Los Diables Roges de Salford tenguèron a distància los Vikings de Widnes: 30-10.
 
 
Rescontres internacionals
 
Aquesta setmana, lo campionat NRL marcarà una pausa per daissar plaça a de rescontres internacionals e, d’en primièr, lo tradicional ANZAC-Test entre australians e neozelandeses aqueste divendres 5 a Canberra.
 
Una formacion anglesa afrontarà Samoa dissabte 6 a Campbelltown dins un estadi ont se debanaràn tanben las confrontacions entre Papoasia e Illas Cook d’una part e Fidji e Tongà, d’autra part. Coma una revista d’efectiu abans la Copa del Monde de la tardor!



Alan Roch

 

fffff
	Visca la fanga!  De segur, d’unes braves sómian d’un rugbi d’estiu sus de pelenas netetas (mas de còps raspadas), ont se pòt plan véser los jogaires dins los lums dels projectors (se los moissals te chapan pas!) e sustot las marcas dels pairins flocadas suls malhòts (davant, darrièr, sus las margas e sul còl), sus las braietas (sus las ancas e sul costat) e suls debasses! Amb d’atacas ont cap de buf de vent ven pas desvirar la trajectòria millimetrada de las passas…   Mas, per ieu, lo rugbi demòra un espòrt ivernal. Imatges bèls e remembres fòrts pòdon venir de las partidas ont los jogaires sortisson en estatuas de fanga. Coma lo còp passat, ont los Dragons jogavan en blanc e Widnes en negre e qu’acabèron totes burèls!!! La pauma-saboneta ajusta son imprevisibilitat als rebombs dels jorns bèls. Se la pluèja s’i met per dessús amb de còps de ventòrla, aquò es lo camin per de partidas legendàrias que se ne parlarà longtemps.   Me soveni que joguèri un Ginestàs-Rius ont nòstra dobertura riussanèl marquèt una penalitat d’entrada e que tota la partida se passèt en mesclanhas qu’a cada passa e cada placatge la pauma resquitava! Un vèspre plan agradiu (sustot quand jògas a l’ala!). E lo plaser de la docha finala (encara d’aiga!).   Bon, ara, cal una condicion de mai: embarrar tre la primièra gota de pluèja l’elegit que vòl prene la decision d’interdire l’utilizacion del terren! Alan Roch Cronica occitana dins XIII-Magazine (abril de 2017)