Bandièra01 1180x150: País Invisible

Actualitats

Rif: contunhan las protèstas massissas contra la precarietat e la marginalizacion

L’estat marroquin los acusa de “fomentar lo separatisme”

| Mohamed Ettaki
Contunhan las protèstas nombrosas a Taghzut contra la precarietat e la marginalizacion. La vila berberofòna del país del Rif, al nòrd del reialme de Marròc, visquèt lo 18 de mai passat una de sas manifestacions mai nombrosas dempuèi un an e mièg de protèstas. De remembrar qu’en octòbre de 2016 de milièrs de personas manifestavan per mostrar lor indignacion après la mòrt de Mouchine Fikri, un jove peissonièr que moriguèt esclafat dins un camion d’acampatge de bordilhas, quand ensajava de recuperar lo peis que la polícia li aviá confiscat.
 
Ara las protèstas tenon totjorn un caire social e denóncian la seculara marginalizacion economica que la patís lo país del Rif, estofat pel govèrn de Marròc. Revendican de melhoraments dins l’educacion, la santat e l’emplec.
 
En aquesta ocasion, fòrça proprietaris de botigas e d’autres comercis an jonch las protèstas en fasent quitament la cauma, çò rapòrta Reuters. En mai d’aquò, de fonts berberistas mençonadas per Nationalia, rapòrtan una repression fòrça violenta de l’estat marroquin, que talha lo provesiment d’aiga e d’electricitat als abitants per contrarotlar las manifestacions e que dempuèi qualques jorns a menat a la vila de milièrs de policièrs.
 
 
 
Marròc los acusa de “fomentar lo separatisme”
 
De son costat, lo govèrn de Marroc ditz que “cal escotar” las revendicacions, mas acusa a l’encòp los manifestants de seguir “d’agendas estrangièras” e de fomentar “lo separatisme”.
 
Un dels dirigents del movement de protèsta, Nasser Zefzafi, considèra que la mobilizacion unís lo pòble del Rif, segon Le Monde. “Las bandièras rifencas e amazighs son abitualas dins las protèstas”, çò ditz del temps que recòrda qu’aquel país montanhòl berberofòn “recep pas lo meteis tractament que la rèsta de Marròc”. En mai d’aquò, assegura que las femnas an un “ròtle clau” a las mobilizacions car la majoritat dels caumaires son de femnas.
 
 
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article