Bandièra01 1180x150: País Invisible

Actualitats

Après la desfacha de Raqqa e Mossol, s’acaba l’Estat Islamic o ven pus perilhós?

Lo califat ensajava de crear un estat real amb poder sus sos ciutadans, mas ara poiriá tornar a sas originas: las atacas terroristas indiscriminadas dins quin país que siá del Mond

Publicàvem diluns passat que las fòrças iraquianas e curdas liberèron Mossol de l’Estat Islamic. Publicàvem tanben la setmana passada, que la vila de Raqqa, considerada coma la capitala dels jihadistas en Siria, es a mand d’èsser liberada per una coalicion de combatents, mai que mai de curds. S’agís de las reviradas pus fòrtas qu'a patidas l’autoproclamat Estat Islamic, e lo fach qu’ajan destruch la mosqueta ont se proclamèt lo califat en junh de 2014 demòstra qu’eles o sabon. Mas se tot aquò es la fin de l’organizacion terrorista o, per contra, tot aquò l’enfortís? Los analistas son pas d’acòrdi e VilaWeb a publicat una analisi que nos sembla important de mençonar.


Mossol èra a las mans de l’Estat Islamic dempuèi junh de 2014. Amb un milion e mièg d’abitants èra lo principal centre sunnita d’Iraq. Son importància simbolica èra enòrma car Abu Bakr Al Baghdadi aviá causit aquela vila per proclamar lo nomenat califat. Mas èra tanben important pr’amor qu’èra un nos geografic, pel petròli e perque èra la principala font dels impòstes de l’Estat Islamic.
 
 
L’Estat Islamic contraròtla un territòri vast e mai s’a perdut sas doas vilas màgers
 
Après la casuda de Mossol, l’Estat Islamic a un territòri qu'es solament una fraccion de çò qu'arribèt d’èsser. Al moment de son expansion maximala, en 2015,  contrarotlava una bona part de Siria, una part fòrça vasta de las províncias de l’oèst d’Iraq, una part de Libia e qualques vilas d'Iemèn.
 
Ara, per contra, sa capacitat de contraròtle es limitada a la zòna pus desèrtica de Siria e a una partida d’Iraq. E aquí i pèrd de territòri rapidament. En Iraq i demòran encara cinc vilas contrarotladas per l’Estat Islamic, mas cap d’elas es pas comparabla a Mossol.
 
L’impacte de la liberacion de Mossol pòt causar una decepcion tan granda coma la que motivèt la casuda de Raqqa en Siria. Las doas vilas principalas del califat son ara fòra lo territòri que lo contraròtla l’Estat Islamic, e aquò pòt determinar un cambiament d’estrategia. Lo califat ensajava de crear un poder geograficament consolidat per tal de proclamar un estat real amb poder sus sos ciutadans, mas ara, la malescasuda lo pòt far tornar a sas originas: las atacas terroristas indiscriminadas dins quin país que siá del Mond.
 
 
Mentre que pèrd de territòri en Siria e en Iraq, l’EI ganha d’adèptes dins tot lo Mond
 
Dempuèi lo mes de mai de 2016, quand èra ja evident que l’autoproclamat Estat Islamic perdiá de territòri, l’organizacion jihadista a cambiat son discors. Abu Muhammad Al Adnani, que n’èra lo pòrtavotz abans morir, diguèt que la lucha consistissiá pas a defendre lo territòri mas a far mal als païses que los atacavan. “Se los Estats Units creson que nos vençon quand perdèm una vila, s’enganan completament”, çò diguèt.
 
Òr, dins los darrièrs meses, l’Estat Islamic s’es espandit clarament en Asia e a l’ora d’ara a de brancas localas dins dètz e uèch estats desparièrs, amb mai o mens de capacitat per far mal. De soslinhar lo grand aument de sas activitats en Indonesia e a las illas Filipinas.
 
Per ansin, lo chepic de mai d’un analista es que la desfacha de l’autoproclamat Estat Islamic en Raqqa e a Mossol poiriá implicar la dispersion dels activistas. Segon las darrièras estimacions, a l’ora d’ara i a setze mila soldats de l’Estat Islamic dins lo territòri de l’autoproclamat califat. Un nombre important son d’estrangièrs, dont fòrça venon de païses occidentals, tanben d’Occitània, atraches pel discors jihadista difondut mai que mai sus Internet.
 
La granda question que se pausa es ont anaràn aqueles sètze mila militants jihadistas s’aquel territòri despareis. Paradoxalament, la creacion del califat signifiquèt una concentracion dels militants que ne facilitava lo contraròtle. Mas se se tornan escampilhar, poirián aumentar los atemptats dins lo mond occidental dins los meses avenidors, segon qualques analistas.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc Palma
2.

Valen pas excusas, cal acabar amb l'El, cal acabar amb la guerra de Siria, cal acabar amb lo terrorisme alhà ont sia. La victòria representa la patz, e que los emigrant pogan tornar a ca seva. No valen pas las excusas !

  • 3
  • 0
lachaud
1.

Tot depend de qui finança los militants. Aniram pas bian lonh si an pus d'armas e d'argent.
Mas, qui los finançan aura?

  • 3
  • 0

Escriu un comentari sus aqueste article