An publicat dos nòus rapòrts sus la coneissença e l’usatge de la lenga basca, çò rapòrta Nationalia. D’un caire, lo 6n Sondatge Sociolingüistic rapòrta que lo nombre de bascofòns s’es estabilizat en Iparralde, de l’autre lo Cluster de Sociolingüistica afirma que dins cèrtas regions l’usatge per carrièras aumenta mentre que s’amendrís dins d’autras.
 
Lo 6n Sondatge Sociolingüistic rapòrta qu’al Bascoat Nòrd i a ara 51 200 locutors de mai de 16 ans, es a dire un 20,5% dels abitants. Fa cinc ans aquela chifra èra de 51 100, mas lo nombre d’abitants èra inferior e doncas representava lo 21,4%. Las proporcions pus nautas de bascòfons se tròban demest las personas atjadas; lo 28,1% de las personas de mai de 65 ans son bascofònas del temps que demest los joves d’entre 16 e 24 ans, lo 18,9% son de locutors de basco.
 
De son costat, lo Cluster de Sociolingüistica a presentat las donadas del 7n Mesuratge de l’Usatge de las Lengas per Carrièras, que servís a verificar lo gra d’usatge public del basco. Dins l’ensems del Bascoat, l’usatge de la lenga del país per carrièras a davalat del 13,2% en 2011 al 12,6% en 2016. Lo rapòrt parla de  “lums e d’ombras”: en Alaba, Navarra (Bassa e Nauta) e Sola creis l’usatge del basc mas en Guipuscoa, Biscaia e Labord demesís. Lo grop d’edat qu’emplega mai la lenga per carrièras son los enfants, seguits dels joves, e lo que la fa mens servir son los vièlhs. Dins totes los territòris e a totes los atges, las femnas utilizan mai lo basco que los òmes.