Bandièra01 1180x150: Comuna de Tolosa

Actualitats

Rugbi de XIII: Fiji se convida en mièja finala mondiala

| Rugby League World Cup 2017 - RLWC.com
Los quarts de finala de la Copa del Mond del XIII an rendut lor verdicte: tres resultas logicas e una suspresa prometon de plan interessantas mièjas finalas.
 
Tròp fòrts, los Cangorós
 
Lo primièr quart se joguèt divendres de vèspre a Darwin. Siaguèt un còp de mai la demostracion que l’evolucion logica e optimala del tretzista comun es de venir Cangoró. Los braves Samoans ne faguèron l’amara experiéncia e encaissèron un 46-0.
 
Fin de cicle pels Kiwis
 
Dissabte, dos quarts de finala se debanèron en Nòva Zelanda. Los tongans s’èran subrepassats per batre la Nòva Zelanda la setmana passada. Es pas dins lo meteis estat d’esperit que dintrèron sus la pelena per afrontar Liban. Los òmes del cèdre, menats pel dobertura-NRL Moses, lor i opausèron de braves problèmas. Marca finala per Tònga: 24-22, mas los libaneses pòdon plànher un ensag refusat qu’auriá cambiat la destinada de la partida. Fasiá fresquet a Wellington per l’oposicion entre los Kiwis e los fijians. S’esperava una revòlta dels Negres aprèp la desfaita fàcia a Tònga. Mas son los fijians que prenguèron la direccion de la partida. Dins lo primièr temps, poguèron pas marcar que los 2 punts d’una penalitat. A la represa, los Kiwis contunhavan de se mostrar malaisits mas egalizavan a 2-2. Los fijians passèron una novèla penalitat e tenguèron lo còp fins a la còrna sus aqueste magre avantatge de 4-2 fàcia a las aproximacions e las fautas de man dels locals. Aqueste còp, Shaun Jonhson poguèt pas sortir un miracle de sa passa o de son jòc al pè. Los Kiwis an una formacion de tornar bastir que son plan luènh del nivèl que los menèt al títol mondial en 2008 e a la finala en 2013. Pels fijians, se pòt pas vertadièrament parlar de suspresa mas de confirmacion: los Blaus èran ja en mièja finala en 2013.
 
Los angleses pel XIII europèu
 
Lo quatren quart se joguèt aqueste dimenge de vèspre a Melbourne entre Anglatèrra e Papoa-Nòva Guinèa. Los Kumuls (aucèls de paradís) coneguèron las dolors de l’infèrn amb las puntas del diable anglés que passan mai que mai per las alas. Victòria 36-6 pels angleses. Avètz dit 36-6? E òc, la meteissa marca que contra França.
 
En rota per la finala de Brisbane
 
La primièra mièja finala se jogarà aqueste divendres a Brisbane e opausarà, coma en 2013 a Wembley, australians e fidjians. La segonda se jogarà dissabte a Auckland entre angleses e tongans. Caldriá un concors excepcional de circonstàncias per que los Cangorós se trapèsson pas en finala. Lo rescontre d’Auckland s’anóncia mai equilibrat.
 
Las femnas tanben
 
Austràlia reçaup tanben la Copa del Mond femenina del XIII. Sièis formacions se disputan lo trofèu: Austràlia, Nòva Zelanda, Papoa, illas Cook, Anglatèrra e Canadà. La finala se jogarà en dobertura de la finala masculina lo dissabte 2 de decembre a Brisbane.
 
 
 
 
Alan Roch
de Sydney estant

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article