Dètz e uèch organizacions umanitàrias internacionalas denóncian las pietadosas condicions dels demandaires d'asil en Grècia. Dins una letra dobèrta, aquelas organizacions, dont Amnestia Internacionala, Human Rights Watch, lo Comitat Internacional del Socors, Oxfam Internacional, Aitima e lo Conselh Norvegian pels Refugiats, demandan al primièr ministre, Alexis Tsipras, que meta fin a la "politica de contencion" del govèrn grèc de confinar los demandaires d'asil dins las illas de la mar Egèa, çò rapòrta La Marea.
 
L'ivèrn se sarra e de milièrs de personas se tròban dins de condicions deplorablas. De soslinhar los enfants plan petits, las femnas prenses, las personas andicapadas. Segon las organizacions umanitàrias, l'acòrdi entre l'Union Europèa e Turquia pòt pas justificar que se fòrce aquelas personas a viure dins de condicions que mancan a lors dreches e pòrtant tòrt a lor santat e lor dignitat.
 
Dempuèi l'aplicacion d'aquel acòrdi, signat en març de 2016, las illas de Lèsbos, Quios, Samos, Kos e Lèros, son venguts de luòcs de confinament indefinit per de milièrs de femnas e d'òmes que i vivon dins de condicions infraümanas.
 
La situacion es particularament critica a Samos e a Lèsbos, ont mai de 8300 demandaires d'asil e migrants vivon dins d'installacions preparadas per solament 3000 personas.
 
Las autoritats grègas an anonciat que 2000 sollicitaires d'asil de mai seràn menats de las illas al continent, coma mesura de decongestion d'urgéncia. Mas sembla qu'aquela mesura serà pas sufisenta.
 
Las organizacions signatàrias d'aquela letra dobèrta demandan al govèrn grèc que totes los demandaires d'asil de totas las illas sián menats sul continent e qu'aquí recépian un lotjament e de servicis idonèus per satisfar lors besonhs e garentir que las autoritats donen seguida amb justícia a las sollicitacions d'asil.