Bandièra01 capçalera  1180x150: Novestivada

Actualitats

Marine Le Pen mesa en examen per aver publicat sus Twitter d’imatges de l’EI

S’es declarada colpabla, la cap ultradrechista risca una pena de tres ans de preson e una multa de 75 000 èuros

La presidenta del Front Nacional francés, Marine Le Pen, es estada mesa en examen per aver publicat sus Twitter d’imatges espaventoses de las exaccions de l’autoproclamat Estat Islamic, çò rapòrta l’AFP. Las fòtos mostravan la decapitacion del jornalista estatsunidenc James Foley, un jove soldat jordanian cremat viu dins una gàbia e un soldat sirian de 19 ans esclafat per un tanc. En novembre passat, l’Assemblada francesa li levèt l’immunitat parlamentària per que la poguèsson jutjar per aquel afar.
 
La cap ultradrechista es acusada de “difusion d’imatges violents”. D’efièch, la justícia s’apièja sus l’article 227-24 del còde penal francés, que punís la difusion d’”un messatge de caractèr violent, qu’incite al terrorisme, pornografic, o sa natura pòrte grèvament tòrt a la dignitat umana” del moment qu’aquel messatge es “susceptible d’èsser vist o percebut per un menor”. S’es declarada colpabla, Le Pen risca una pena de tres ans de preson e una multa de 75 000 èuros.
 
 
Le Pen se batiá amb un jornalista
 
Los faches se passèron en 2015, quand Le Pen respondiá a Jean-Jacques Bourdin, un jornalista que la cap frontista l’acusava de l’aver comparada amb l’organizacion terrorista. Alavetz, ela publiquèt aqueles imatges amb lo messatge “Daish es aquò”. Puèi traguèt l’imatge de la decapitacion de Foley a la demanda de la familha de la victima.
 
De son costat, Bourdin desmentiguèt d’aver comparat l’FN e l’EI e planguèt “la reaccion isterica” del partit ultrafrancista. D’efièch, Bourdin aviá fach sus BFM TV una analogia entre la pojada del jihadisme e aquela del Front Nacional.
 
 
Cazeneuve senhalèt las fòtos a la polícia
 
En aquel temps, las fiuladas d’imatges esglaioses de Marine Le Pen escandalizèron lo qu’èra ara ministre de l’Interior, Bernard Cazeneuve, que senhalèt, per mejan de la plataforma Pharos de la Direccion Centrala de la Polícia Judiciària, las fòtos en question per fin que la polícia “se poguèsse sasir de l’afar”. Aquelas fòtos “son de propaganda de Daish e son a aquel títol una abominacion e un vertadièr insulte a totas las victimas del terrorisme”, çò diguèt alavetz Cazeneuve.

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Atis
1.

Mantas causas se poirián reprochar a-n-aquela ideològa malsanitosa, racista e egemonista francesa. Dins sos prepauses, dins sas posicions politicas, la podèm fòrça aisdament criticar. Sul plan fiscal, non seriái pas susprés d'apréner qu'es tant malonèsta e condemnabla coma mantes rics de França o d'endacòm mai… Mas aquí, tròbi lo crimi que li es reprochat relativament menor, de cap a tot çò mai que li deuriá èsser reprochat. A mostrada l'orror. L'orror qu'a mostrada, l'a pas comesa, que sàpiái. Çò òirre es çò qu'a mostrat, non pas lo fait d'o mostrar…

Demòri un pauc perplèxe, subre aqueste darrièr punt.

  • 23
  • 0

Escriu un comentari sus aqueste article