Bandièra01 1180x150: Comuna de Tolosa

Actualitats

crotz-tolosaCreated with Sketch.DaufinatAut DaufinatBriançonés

La solidaritat amb los migrants a ganhat contra la xenofobia dins los Alps

D'occitans de Daufinat e de las Valadas an escalat lo còl de Montginebra per metre a l’abric una quarantena de migrants a Briançon

| Tous Migrants
La solidaritat amb los migrants a vencut la xenofobia. Venguts del Daufinat e de las Valadas, d’occitans d’un costat e de l’autre de la frontièra politica escalèron lo còl de Montginebra per metre a l’abric una quarantena de migrants a Briançon. Aquela accion solidària se debanèt dimenge 22 d’abril, just après que de militants ultradrechistas del grop Generacion Identitària aguèron ocupat lo còl de l’Eschala amb la toca de “barrar la rota” als migrants, davant la passivitat de las autoritats francesas.
 
S’agís de “respondre a aquel mond [los identitaris] en defendent los dreches fondamentals, los de la declaracion dals dreches de l’òme, qu’assegura lo drech d’asil dins lo país d’aculhença”, çò declarèt a Raporterre Benoît Ducos de l’associacion Totes Migrants.
 
La responsa a aquela ofensiva del grop neofaissita venguèt de militants occitans dels dos costats de la frontièra politica. Se tracta de la còla de Totes Migrants de Briançonés e de la de Rainbow 4 Africa, una associacion de drech italian que ten un luòc de sosten a Bardonescha (Val d’Ors).
 
 
“Avèm pas abandonat nòstras montanhas ni als faissistas ni a la polícia”
 
La marcha passèt davant lo pòst frontalièr sens que los foncionaris de la polícia de las frontièras poguèsson intervenir car èran pauc nombroses. Puèi, una vintena de gendarmas los esperava a la sortida d’un tunèl estradièr, mas lo cortègi contornegèron lo cordon per un talús ennevat. Enfin, après una pichona butassada amb los gendarmas, contunhèron lor camin sus la rota de Briançon.
 
Arribèron al Refugi, lo luòc de lor primièra aculhida en Briançon, als crits de “Libertat, libertat!”. Un d’eles, en provenença de Cameron, explicava a Reporterre qu'èra “fièr d’aver escapat a fòrça causas” del temps qu’un òme que veniá de Senegal diguèt qu'aviá pas trobat cap de solucion d’asil en Itàlia e qu’esperava que dins l’estat francés seriá pas lo cas. “Avèm pas abandonat nòstras montanhas ni als faissistas ni a la polícia”, çò disiá una militanta briançonesa de Totes Migrants.
 
 
“Que se seriá passat s’aqueles faissistas aguèsson rescontrat de migrants?”
 
L’eurodeputat de Turin, Daniele Viotti, del Partit Democrata (esquèrra), faguèt lo desplaçament devèrs Nevascha per constatar l’accion del grop ultradrechista. E mai se crei que”chascun es liure de manifestar, es inacceptable que de ciutadans erigischan de falsas frontieras e s’arròguen lo drech de contraròtle”. Per aquela rason interpelarà la Comission Europèa.
 
“Que se seriá passat s’aqueles faissistas aguèsson rescontrat de migrants?” çò se demanda l’eurodeputat. Aürosament, a causa d’un ennevament excepcional, lo còl de l’Eschala es pas encara seguit ongan pels migrants. La còla de Rainbow 4 Africa los an dissuadits de prene aquela rota.
 
Per ara, cap d’aqueles autoproclamats defensors d’Euròpa a pas rescontrat cap de migrant.
 
Podètz trobar mai d’informacion sus Reporterre.

 
 


abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc palma
1.

Los fachistes son quatre gats e un cabo (caporal), coma disen per aquí. Sense l'ajuda dels banquiers e de los poders factics, son pas res.

  • 1
  • 0

Escriu un comentari sus aqueste article