La batèsta es de mai en mai bèla en Elèit 1, la Cup anglesa qualifica una formacion de Championship pels quarts e la finala d’Elèit 2 se jogarà sens los primièrs dos de la fasa de classament: aquí los faits bèls d’una dimenjada ont los Sants de Glaç an tengut un ròtle dins las condicions de debanament de las partidas.

Los Canaris valents mai fòrts que los Singlars nharruts
 
Atal, dissabte a Carcassona, la pluèja se convidèt al dèrbi entre l’ASC e Lesinhan. Dins lo primièr temps, amb lo sosten del vent, los locals ensacavan doas penalitats (Clamenç Herrero) e Vincenç Albèrt puntava l’ensag aprèp una intercepcion e una corsa de 50 mètres: 10-0 per Carcassona a la pausa. L’alièr Alexis Escamilla signava son retorn sus la pelena, aprèp una longa abséncia en rason d’una espatla nafrada, e mostrava qu’aviá pas res perdut de sa velocitat. Carcassona menava 16-0. Mas Lesinhan profeitava d’una patanada jauna a la recepcion d’una candèla, puèi lo centre Gregorius i anava de son ensag entre los pals, lo gigant verd Tualima marcava en fòrça. Demorava 12 minutas de jòc e Lesinhan èra tornat a dos punts: 14-16. Mas la defensa carcassonesa pleguèt pas.
 
A Avinhon, los Dragonets finissián que prenián lo dessús suls locals: 34-30 alara que Palau anava ganhar a Vilanòva: 33-18. St Gaudenç ganhava lo dèrbi de Nauta Garona fàcia a Tolosa: 26-18. Dimenge, Limós se deguèt emplegar per prene lo melhor sus Albi, tornat de 4-16 fins a menar 18-16: 22-18 marca finala en favor dels Blanquetièrs.
 
Pel compte de la 17a jornada, se jogaràn aqueste dissabte 19 de mai: St Estève/XIII Catalan-FC Lesinhan, Albi-AS Carcassona, Avinhon-St Gaudenç; puèi, dimenge: Palau-Limós e Tolosa-Vilanòva.
 
Vilagalhenc-Argon e l’Escura en finala de l’Elèit 2
 
En Elèit 2 , las doas formacions qu’avián acabat en cap de classament jogaràn pas la finala dins una quinzenada al Barcarès.
 
Lo primièr, Vilafranca de Roergue, s’es fait susprene per l’Escura: 31-8, alara que los segonds, los catalans de Baó, èran emportats coma una clèsca voida de cagaròt per la tramontana venguda de Cabardés: victòria de Vilagalhenc-Argon 41-6.
 
Al mes de junh, sul terren de Trentels, la finala de Nacionala 1 opausarà Tolon e Pià; la finala de Nacionala 2 se jogarà entre Trentels e lo Barcarès.
 
 
Cup: los catalans en quart
 
Dissabte, a Brutus, los Dragons catalans se son qualificats pels quarts de la Cup amb una victòria logica fàcia a Whitehaven, formacion de League One; victòria catalana: 56-10.
 
La suspresa venguèt de Leigh, ont los Centurions (Championship) eliminèron Salford 22-10 alara que, dins las autras doas partidas entre formacions dels dos nivèls, Hull FC s’impausèt a Featherstone 38-20 e Warrington daissèt pas d’espèrs a Toronto: 66-10.
 
Leeds se qualifiquèt a Widnes 23-20, e Huddersfield dominèt Wakefield: 24-14. A Castleford, Ben Barba marca tres ensages e Saint Helens se qualifica 36-18. Wigan va ganhar a Hull KR: 28-10.
 
Los quarts de la Cup se jogaràn los 2 e 3 de junh. Lo tiratge al sòrt manda los catalans a Huddersfield, alara que Leeds reçauprà Leigh. Rescontre dels W: Warrington-Wigan e Hull FC se desplaçarà a Saint Helens.
 
 
Pentacosta: temps fòrt de la Superliga
 
Per Pentacosta, plaça a la Dimenjada Magica de Superliga a Newcastle que se dobrirà per la partida entre los dos caps de fila… del Championship: Toronto e Tolosa; los Dragons afrontaràn Salford (dimenge, a doas oras del vèspre –ora occitana–) e una victòria seriá la benvenguda. Las autras partidas al programa son:
   
 
NRL: Lapinons e Polets en forma
 
En Austràlia (www.nrl.com) , la desena jornada vei los Lapinons batre los caps de fila, los Dragons de St Jòrdi Illawarra, 24-10 e los Polets de Sydney anar balhar una leiçon als Combatents neozelandeses: 32-0!
 
 
 
Alan Roch