Bandièra01 1180x150: País Invisible

Opinion

123 – La mòrt peleta

Domenge Caucat

Domenge Caucat

Aliàs lo Montamametas de son ancian mestièr e ara Domenge d'Erau qu'emplegat per l'IEO Erau, E,... RAU!! coma animator, coordinator e professor d'occitan dins de talhièrs setmanièrs

Mai d’informacions

Diga!

«Avèm de coronas de flors,
Per las oras de las dolors
Las rivalizar i a pas mècha!
Nòstre assortiment es tant bèl,
Qu’en lo vegent vos baila enveja
De barrar l’uòlh un pauc pus lèu.»

En 1912, se podiá legir en bona lenga d’òc aquela reclama a la davantura d’un florista-enterraire dau Clapàs. Mas mai d’un sègle après nos vaquí tornar! Lo mercat de la mòrt es florissent florissent que lo Papet-bom-bom va espetar. Tot deu desparéisser! Liquidacion totala! Per una enterralha reüssida, despausatz vòstra lista ante-mortem aquí! Causissètz, o mièlhs compausatz vòstre epitafi! Aicí sèm uòi per aqueles que mancan de saupre viure.

Vòls que te diga?  E ara nos anoncian que l’IA pòt predire l’ora de la nòstra mòrt. Daneses e americans son sus lo còp amb de resultats espantants, çò dison. Son daquòs nommat «la calculeta de l’astrada» fonccionariá a 78,8%. Fan engolir a la mecanica un fum de tas donadas personalas coma ton origina sociala, tos bulletins d’escòla emai aqueles qu’amagavas au papà e a la mamà, tos rendètz-vos amoroses e mai que mai medicals, tos emplecs emai quand fasiás las vendémias au negre per Paga-la-raca de la Chicaneta, ton temps de trabalh e de petanca, ton manjar e subretot ton beure dau cada jorn e tas ganarras mai bèlas etc… E, coma dins la psico-istòria d’Asimòv, estatisticament la maquina te ditz quand serà per tu lo cap dau camin e que cridaràs seba, quand tibaràs l’artelh e que faràs enfin rire tos eretièrs, e malastre grand per la viticultura lengadociana qu’a pas besonh d’aquò d’aquesta passa quand t’arrestaràs de beure...

Bon, me sembla, mercé la conariá naturala que me ten luòc d’intelligéncia artificiala que n’i a un fum dins aqueste mond que son ja en mòrt cerebrala avançada sens o saupre.

Enfin, es çò que ne dise ieu…

 

La guinhada de l’IEO34. E, rau!

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article