Bandièra01 capçalera  1180x150: Novestivada

Opinion

Un sang virat!

Un sang virat!
Un sang virat!
Domenge Caucat

Domenge Caucat

Aliàs lo Montamametas de son ancian mestièr e ara Domenge d'Erau qu'emplegat per l'IEO Erau, E,... RAU!! coma animator, coordinator e professor d'occitan dins de talhièrs setmanièrs

Mai d’informacions

Tèxte legit

Diga! De mancar pas : «Collècta de sang atipica a la Ciutat internacionala de la lenga francesa de Villers-Côtteret». (sic) Macarèl, de qu’esperam per faire un tren especial que se’n aniriá de Pau coma dins la cançon, que passariá a Tolosa, Carcassona, Montpelhièr, Nimes abans que de montar amontdaut per lor ofrir lo sang impur qu’abeura sos selhons dempuòi los sègles dels sègles! Un pauc coma faguèrem un còp èra dins lo temps dels vièlhs amb los vagons pinardièrs qu’afretàvem per lor levar la set.

Aquò dich, cau que l’ESF, Establiment Francés dau Sang, siaga sec coma merlussa e a calòs per n’arribar a d’extremitats coma aquela. N’aguèsson parlat, lor auriam dobèrta la coope de Pesenàs e aquela de Sanch Inhan amb de sang AOC coma o cantava lo paure La Sauze. E vas veire que nos van lèu faire coma dins d’unes païses que se crompan lo sang de la paurilha, de 100€ lo litre en America a 23€ en Alemanha. Fa ja una botelha de vin de las bonas, aquò solide pas que per remplaçar çò que t’an levat…

Bon per ara es per benastre fòra question,  aquí lo Gal auturós quilhat sus sos principis diguèt de non mas, bòta, nos pompan d’un autre biais, non?

Vòls que te diga?  Bon tornem a Villers-Côtteret. Per un mièg litre de rasimat t’ofrisson una plaça a gratis per visitar la ciutat dels lingüicides. Aquí l’ai ! S’aquò es pas de venda desguisada, siái ieu lo Papa d’Avinhon. La ciutat de la França dins l’illegalitat, te vau far petar una sasina au Conselh Constitucionau lèu fach. E volguèsson far rajar la sang, an que de la tirar de sos academicians e ne faire de sanguetas o de botifarra se vòlon. Veirem lèu coma s’acaba l’immortalitat.

Enfin, es çò que ne dise ieu…

 

La guinhada de l’IEO34. E, rau!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article