Pols o poletons?
 
Lo XIII de França es en Austràlia, o per lo mens, los qu'an fait lo viatge en prenent pas per excusas qu'èron nafrats, lasses o que se pausavan per la sason venenta. Quatòrze titulars possibles (una esquipa) absents.
 
La diferéncia èra tròp fòrta amb los joves Cangorós (mens de 23 ans), que presentavan de jogaires acostumats a las partidas de l’NRL. Se pòt pas res reprochar a la bona volontat dels Blaus, mas la marca finala de 62-4 es un novèl carpan que finirà qu’obligarà federacion, clubs (en particular los Dragons) a trapar de solucions e d’acòrdis per que los Pols se contenten pas de faire de figuracion a la Copa del Mond de 2021.
 
Los Blaus an una autra partida de jogar en Austràlia aqueste dimècres contra la Provincia de l'Oèst abans de tornar prene l'avion per Euròpa.
 
 
Austràlia tròp fòrta
 
La partida França-Austràlia U23 èra seguida sus la pelena de Wolongong per doas confrontacions Austràlia-Nòva Zelanda.
 
Cò de las femeninas, victòria australiana: 28-8. Puèi, los Cangorós profeitèron de las fautas neozelandesas (dos ensages sus intercepcion) per s'impausar 26-4.
 
 
La suspresa bèla
 
A Hamilton (NZ), los Lions britanics rescontravan Tònga, dins un semblant de revenge de la mièja finala de la Copa del Mond de 2017 que los angleses avián ganhat sul fil. Tònga, en s'apiejant sus de jogaires d’NRL mas tanben sus de joves sens complèxes, faguèron plegar los europèus: 14-6.
 
Aquesta fin de setmana a Auckland, dos tèstes son programats: Austràlia-Tònga e Kiwis-Lions.
 
 
Las darrièras plaças per la Copa del Mond
 
D'aquel temps, en Euròpa, se tenon las partidas per las darrièras qualificacions per la Copa del Mond de 2021.
 
Irlanda bat una Espanha de fòrta preséncia carcassonesa e albigesa: 42-8. Escòcia se mòstra sens pietat per Serbia: 86-0. A venir: las partidas Grècia-Escòcia (1/11, a... Londres), Espanha-Itàlia (2/11), Serbia-Grècia e Irlanda-Italia (lo 9/11). Sens suspresa, Irlanda e Escòcia deurián validar lor participacion a la fasa finala de la competicion mondiala.
 
 
Elèit 2: dur d'èsser campion
 
Debuta de sason complicada en Elèit 2 pel campion 2019: Baó que pèrd a Lion: 28-12: tresena desfaita per 4 partidas jogadas! Tres equipas son en cap de classament amb 3 victòrias e una desfaita: Entraigas, Vilafranca e Pià.
 
 
Pas de cadena pels Dragons
 
Autre gròs problèma pel movement tretzista occitan e catalan: ara per ara, los Dragons se trapan sens difusaire televisual e, amb eles, tota la competicion de Superliga. La cadena L'Équipe ven d'arrestar sens explica las discussions. Se parla d'anar tornar veire BeInSport qu'a decidit fa unes meses de renovelar pas l'acòrdi amb los responsables de la competicion. Lo còst del XIII es una goteta d'aiga fàcia a çò que còstan los dreits pel fotbòl e amb una qualitat d'espectacle mai fòrta (nos sembla plan, a nosautres que sèm objectius) del costat oval. Se capita pas de comprene l'ostracisme contra lo XIII!
 
 
 
Alan Roch