Supèrb Tònga
 
Lo primièr rescontre vegèt la larga victòria de Fiji fàcia a Samoz: 44-18.
 
Austràlia es en reconstruccion: de jogaires claus an daissat la formacion, mas, sus la pelena, la qualitat èra plan presenta. Levat qu’en fàcia, los tongans, aprèp lor victòria contra los britanics, se’n daissèron pas contar. Se mostrèron mai solidaris e mai imaginatius que los Cangorós per signar una victòria istorica: 16-12. Avián marcat los primièrs, amb un despart al ras del tengut de Will Hopoate aprèp mièja ora d’una pauma viva; aquò aviá desrevelhat los australians que marquèron còp sus còp per menar 12-6 a la pausa. Determinats, los tongans resistiguèron abans de marcar dos còps per Michael Jennings e Tevita Pangai. Los Cangorós ensagèron de capvirar la situacion, mas los Roge e Blanc tenguèron còp.
 
 
De leons sens urpas
 
Per lor segond tèst de lor virada dins lo Pacific, aprèp la desfaita fàcia a Tònga, los Leons desfisavan los Kiwis. Dins lo primièr temps d’una batèsta nharruda, cada formacion s’acontenta d’una penalitat. Una traucada de l’arrièr Tuivasa-Shek que trapa d’una passa supèrba e magica son alièr Isaako permet als locals de prene l’avantatge. Corey Harawira-Naera se jòga de tres defensors sus l’esquina per puntar dins l’en-but. L’ensag aürós de Daryl Clark tornarà pas lo sorire als Leons que pèrdon 12-8. Revenge aqueste dimenge a Christchurch (de veire sus la cadena L’Équipe). Aquò promet!
 
 
Tres qualificats de mai per la Copa del Mond
 
Escòcia assegura sa qualificacion per la Copa del Mond de 2021 mercé a una victòria fàcia a Grècia: 42-24.
 
La victòria sus Espanha 34-4 manda los venceires italians e tanben los irlandeses en Copa del Mond; darrièra plaça europèa en jòc entre Serbia e Grècia a Belgrad aqueste dissabte 9 de novembre.
 
Lo 16n qualificat sortirà d’una partida que poirà semblar desproporcionada a d’unes, mas pas brica als coneisseires: rescontre entre los Estats Units d’America e las illas Cook (Kūki’Āirani, en maòri) lo 27 de novembre a Jacksonville.
 
 
Pià, primadièr en Elèit 2
 
Los Batalhièrs de Pià plegan Vilagalhenc-Argon dins las darrièras 10 minutas per ganhar 20-18 e prene lo cap del classament de l’Elèit 2. Illa se va impausar a Lion 48-0 e Baó torna trapar lo camin de la victòria fàcia a Vilafranca: 20-14. Carpentràs va ganhar lo dèrbi de Vaucusa a Entraigas: 20-16 e Selon bat l’Escura: 36-22.
 
 
Dimenjada Magica per dobrir la sason d’Elèit 1
 
La Dimenjada Magica se debanarà lo dissabte 16 e lo dimenge 17 de novembre a l’estadi Domèc a Carcassona per dobrir la sason d’Elèit 1 amb doas partidas lo dissabte: Palau-Avinhon e Lesinhan-Limós e tres lo dimenge: Tolosa-Sent Gaudenç, Albi-Vilanòva e lo revenge de la finala del campionat passat: Carcassona-Dragonets.
 
 
 
 
Alan Roch