Lo fins ara ministre dels afars exteriors d’Israèl, Eli Cohen, a reconegut de responsabilitats del govèrn israelian dins l’ataca comesa per l’Hamas dins lo sud del país lo 7 d’octòbre. L’incursion mortala tuèt 1200 personas e faguèt unes 250 ostatges. Cohen plaideja per la creacion d’una comission estatala independenta per investigar d’a fons sus l’agression massissa après l’acabada de la guèrra.

“Lo govèrn a sas responsabilitats. A mon vejaire, a la fin de la guèrra caldriá crear una comission estatala independenta d’investigacion per examinar totes los diferents factors”, çò afirmèt Cohen dins una entrevista realizada dins lo jornal israelian Maariv. Aquela comission, çò apondèt, deuriá agir lo pus lèu possible.

La presa en compte de responsabilitats a son fondament. Segon l’edicion del jornal israelian Haaretz  del 12 d’octòbre, la nuèch abans l’ataca, lo cap del Directòri d’Intelligéncia de las Fòrças de Defensa d’Israèl, Aharon Haliva, aviá recebut d’informacions sus una activitat inabituala de l’Hamas. Ça que la, la considerèt coma un possible exercici, e aconselhèt d’atendre fins a l’endeman de matin abans de prene de mesuras. Una decision que s’es revelada fatala.