Lo sindic d’Aran, Carlos Barrera, reclamèt ièr a la Generalitat de Catalonha lo transferiment de las competéncias en suspens e lo començament de las nòvas negociacions per convenir d’un nòu sistèma de finaçament. Tot aquò demorèt arrestat a causa del contraròtle del govèrn espanhòl sul de la Generalitat, amb l’aplicacion de l’article 155 de la Constitucion espanhòla.
 
Barrera o diguèt ièr dins son discors a l’escasença del jorn nacional d’Aran, que se festeja cada 17 de junh per commemorar la restauracion de las institucions aranesas fa 27 ans. Los conselhièrs araneses los acompanhèt lo conselhièr (ministre regional) d’accion exteriora de la Generalitat, Ernest Maragall, que mostrèt son sosten a “afortir” e “espandir” los dreches d’Aran.
 
 
Paralisi dempuèi lo 27 d’octòbre
 
Lo 27 d’octòbre passat, l’estat espanhòl aplicava l’anullacion de las institucions catalanas, coma veniá de o aprovar lo Senat a la demanda del govèrn de Mariano Rajoy. Aquel contraròtle a provocat una tièra de pèrdas de dreches, de servicis, de subvencions e d’emplecs, que dempuèi lo 17 de mai passat deu restituir lo nòu president de la Generalitat Quim Torra.
 
Dins aquel sens, la prioritat pel sindic d’Aran es que se realize dos transferiments ja pachats fa un an: un sul transpòrt sanitari e dels pompièrs e un autre sul cofinançament del centre geriatric de Les (Quate Lòcs). Parallèlament, Barrera reclama que se comence las negociacions del nòu sistèma de finançament pel Conselh Generau, “que ja s’aurie d’auer aplicat en 2018 mas, coma que non s’a pogut negociar, lo [demoren] auer entà 2019”.