Pòdi pas dire que l'administracion publica es pas al servici dels ciutadans, que soi filh d'ensenhaires! Mas, coma dich dins lo primièr comentari, cal precisar de qual servici parlam...

L'administracion publica ?

Quina administracion publica ? L'educacion, encara que nacionalsita francesa, los espitalièrs publics, los servicis fiscals que fan pagar los rics per ajudar los paures, los vestigis pietadoses de çò que foguèt a la pòsta e a la SNCF, e tanben çò qu'èran los agents d'EDF-GDF, totes aqueles servissián lo public, sense cap de dobte, al mens relativament al contèxte nacionalista francés generalizat.

Per contra, gendarmas e policièrs, e administracion de la justícia an pres la fascista tendéncia a servir los possedissents, al despens dels despossedits, e donc los rics als despens dels paures, e los blancs als despens dels autres, e los òmes als despens de las femnas. Las quitas leis son faitas per enriquir los rics en apaurissent e en espleitant mai o mens vergonhosament los paures, en forabandissent e criminalizant de mai en mai tota contestacion possibla contra aqueste estat de fait, en avantajant sempre los fòrt als despens dels febles. Basta de veire una estona çò que las leis fan de las nòstras lengas ditas de "frança" per ne mesurar l'orror.

E donc, car Jornalet, vòstra question es mal pausada : quina administracion ? Per administrar qué ? Per definicion, lo servici public servís lo public, mai que de se servir d'el coma o fa lo servici privat que vòl far moneda e res mai.

Mas quand las leis, dins las perspectivas (neo)liberalas, an per tòca de desmantibelar los servicis publics, alavètz aquí, es segur que las administracions encargadas de la mesa a execussion d'aquelas leis orbraràn clarament contra, frontalament contra los interèsses del public. Non ne pòt anar de ges de biais autrament. Una administracion neoliberalizanta non pòt èsser mai publica que l'aiga pòt èsser sèca.