Bandièra01 1180x150: Comuna de Tolosa

Actualitats

L’estranh dialòg de Nadia Murad e Donald Trump

Lo rescontre del president dels Estats Units amb l’activista iazidita, subreviventa de l’Estat Islamic, nos a mostrat una conversa de dimension surrealista

| Alex Brandon/AP/SIPA
Lo rescontre del president dels Estats Units, Donald Trump, amb de subrevivents de las persecucions religiosas nos a mostrat una conversa de dimension surrealista de Trump amb l’activista Nadia Murad, una femna iazidita que l’autoproclamat Estat Islamic n’aviá fach una esclava sexuala. Gràcias a sa lucha, Murad es venguda una referéncia mondiala pels dreches dels iaziditas fàcia al genocidi qu’an patit: a recebut lo Prèmi Sakharov del Parlament Europèu e lo Prèmi Nobel de la Patz.
 
L’imatge de l’amassada es pro estranh. Trump èra assetat sus son cadieral en tornant l’esquina als subrevivents qu’èran dreches darrièr el. Al moment que l’ambaossador estatsunidenc per la libertat religiosa la presentèt, Nadia Murad ensagèt de profechar l’escasença per explicar al president la situacion de son pòble e cridar ajuda. Trump l’interrompèt.
 
Murad: "Espèri que vos poiretz telefonar o far quicòm amb los govèrns d'Iraq e de Curdistan..."
 
Trump: "Mas l’Estat Islamic i es pas pus, i son ara los curds... E qual mai?"
 
Murad: "Lo govèrn iraquian. Pòdi pas anar en cò mieu e viure dins un endrech segur e recobrar ma dignitat. Se tracta pas de l’Estat Islamic, mas de nòstra identitat. Mon pòble pòt pas tornar, sèm mièg milion de personas. De milièrs de iaziditas an fugit devèrs Alemanha per de camins plan perilhoses. Non volèm pas èsser refugiats, mas trobam pas cap d’endrech segur ont viure. Se vos plai, fagatz quicòm, s'agís pas d'una sola familha, es tota una comunautat".
 
Trump: "Coneissi la region fòrça plan."
 
[...]
 
Murad: "Tuèron ma maire, e mos fraires, daissèron...”
 
Trump: "E ont son, ara?"
 
Murad: "Los tuèron. Son dins una fòssa comuna "
 
[...]
 
Trump: "E vos avètz lo Prèmi Nobel de la Patz... Es pas de creire! Nos podètz explicar per quina rason lo vos an donat?”
 
Murad: "Per quina rason? Après çò que m'arribèt, me rendèri pas. Ai volgut explicar a totòm que l'Estat Islamic violèt de milièrs de femnas iaziditas. Es estat lo primièr còp que de femnas d'Iraq explicavan çò qu'èra passat."
 
Trump: "Es vertadièrament aital? Es lo primièr còp? Vos n’escapèretz?”
 
Murad: “Me n’escapèri, mas soi pas encara liura.”
 
[...]
 
Murad: [a prepaus de sa familha desapareguda] "Sabèm pas se l’Estat Islamic los a tuats a totes o se son en preson, mas i a 3000 femnas e enfants desapareguts, compreses ma neboda, mon nebot e ma conhada. Nos telefonèt fa qualques ans e nos diguèt qu’èra en Siria, mas ne sabèm pas pus res."
 
Trump: "O regardarem, o regardarem” 




Fugiguèt la captivitat
 
Nadia Murad es del vilatge de Kocho, dins lo parçan de Sinjar, dins lo nòrd d’Iraq. Après assassinar totes los òmes del vilatge, los militants d’Estat Islamic menèron las femnas e los enfants e ne faguèron d’esclaus. Las femnas foguèron vendudas mai d’un còp e esplechadas sexualament. Las femnas vièlhas foguèron executadas. Murad escapèt a la captivitat en novembre de 2014.
 
Los iaziditas son un grop etnicoreligiós de lenga curda que viu, sustot, dins divèrsas encontradas de Curdistan e d’Armenia —e ara, tanben, en exili—. L’Estat Islamic los considèra coma un grop d’infidèls e d’adoradors del diable que meritan l’extermini.
 
Murad foguèt nomenada per l’ÒNU ambaissadora de bona volontat per la dignitat dels subrevivents del trafec de personas e recebèt los prèmis Sakharov e Nobel de la Patz. Es venguda una de las pòrtavoses mai reconegudas del pòble iazidita, e s’es consagrada a far prene consciéncia a la comunautat internacionala de l’agonia patida per aquel pòble a causa de las atrocitats de l’Estat Islamic.
 
Murad reclama a l’ÒNU e als principals govèrns del Mond que socorran las femnas e los enfants iaziditas.

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Cresi que Tump s'ha interessat per lo que li a contat e qu' a estat correcta.

  • 4
  • 4
Ferrand Al Quièr
2.

Perque pretendètz meçorguièrament qu'aqueste (abséncia de) dialòg foguèra subrerealista ?

Subrerealista, non o foguèt de ges de biais ! Lo Subrerealisme s'esfòrça d'explorar l'inconscient personal e collectiu e sas interfàcias significantas a-causalas amb lo mond objectiu e deliurant l'imaginari de tot limit estequit… La filosofia del Subrerealisme consistís en una teoria de l'amor (pro vesina, fin finala, de la dels trobadors sus mantes punts), de la vida, de l'imaginacion, dels rapòrts de l’uman e del mond. Le Subrerealisme es una fòrma de "liberacion totala" e a l'encòp una "perseguida de la vertat". Non es incopatible amb la metafisica dins la mesurz qu'es tanben lo "messagièr d'una transcendéncia".

Res a veire — ne jujaretz — amb aquesta convèrsa ont una femna plan senuda e intelligenta a assajat de badas de discutir amb una armèla, tant pèga coma una mala sense ponhada…

Per saber çò qu'es lo Subrerealisme, vos recomandi la lectura menimosa del libre seguent :

Ferdinand ALQUIÉ
"Philosophie du Surréalisme" - Flammarion, Paris, 1955

Per saber çò que n'es del trumpisme, per contra, vos petaçaretz sense ieu…

  • 5
  • 8
SAnt Antòni Galamus
1.

Murad reclama a l’ÒNU e als principals govèrns del Mond que socorran las femnas e los enfants iaziditas. E a plan rason ! Mas los òmes del sieu pòble, eles, pòdon crebar boca badanta, eles, aquò rai ? Qué son venguts, los que son pas estats violats ? Totes descapitats ?

  • 4
  • 3

Escriu un comentari sus aqueste article