Bandièra01 1180x150: La Passem

Actualitats

InternacionalPoliticaSocietat

Malta: d’activistas son intrats dins lo burèu del primièr ministre per exigir sa demission immediata

Lo primièr ministre aviá ja anonciat que demissionariá lo 12 de genièr a causa de l’enquista sus l’assassinat de Daphne Caruana Galizia

Environ quaranta activistas son intrats, aqueste diluns passat de matin, dins lo burèu del primièr ministre de Malta, Joseph Muscat. Los manifestants reclaman sa demission immediata a causa de l’enquista per l’assassinat de la jornalista Daphne Caruana Galizia.
 
Los activistas avián esquivat la polícia que susvelhava lo sit e reüssiguèron a intrar per una pòrta laterala. Portavan de tambors, de fiulets, de bandièras e de naut-parladors. Un còp dedins,  s’assetèron en blocant l’intrada al burèu del primièr ministre.
 
Puèi, la polícia barrèt la pòrta laterala e daissèt los activistas dins la bastissa. La sòrre de Daphne Caruana Galizia anèt sus plaça e exigiguèt dels agents que daissèsson los jornalistas accedir a l’interior per enregistrar los manifestants.
 
Muscat es pas dirèctament restacat a l’assassinat mas l’enquista senhala divèrsas personas fòrça pròchas d’el. Es per aquela rason que lo primièr ministre anoncièt que demissionariá lo 12 de genier, quand lo Partit Trabalhista elegirà son successor.
 
 
Una jornalista qu’aviá desvelat de cases de corrupcion
 
Daphne Caruana-Galizia foguèt tuada en octòbre de 2017 a causa de la fòrta explosion que la patiguèt sa veitura. Doas setmanas abans, aviá dich a la polícia que crenhiá per sa seguretat.
 
Aviá 53 ans e èra fòrça coneguda per la publicacion d’informacions que desvelavan de famoses cases de corrupcion del país. O fasiá per mejan de son blòg Running Commentary. Aquí denoncièt que lo ministre de l’energia Konrad Mizzi èra mençonat dins los Papièrs de Panamà e, pus tard, raportèt quitament que lo primièr ministre del país e sa femna beneficiavan de l’offshore Egrant.
 
Segon una recèrca de Reuters, Fenech èra proprietari d’una societat secreta sonada 17Black que finançava de societats secretas de Panamà que son proprietat de Schembri e de Konrad Mizzi, ministre del torisme.
 
 
 
 


abonar los amics de Jornalet
 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article