Los manifestants an tornat prene las carrièras de las principalas vilas dels Estats Units per protestar contra la mòrt de Breonna Taylor, après aprene que los policièrs implicats dins lo crime son pas estats inculpats per la justícia.
 
Las protèstas comencèron d'un biais pacific fa qualques jorns a Louisville (Kentucky). De còps que i a, totun, qualques manifestants afrontèron de grops de contramanifestants que portavan de tengudas militaras e èran armats de fusilhs, çò rapòrta la cadena CNN. Durant la dimenjada passada, lo cònsol màger decretèt lo cobrifuòc. Segon lo cap interimari de la polícia de Louisville, Robert Schroeder, un agent a recebut una bala al maluc e un autre a l’abdomen. Se pòrtan plan.
 
D’autras vilas dels Estats Units an viscut tanben de protèstas nombrosas, es lo cas de Washington, Nòva York, Atlanta, Denver, Columbus e Filadèlfia.
 
 
“Indiferéncia extrèma per la valor de la vida umana”
 
Una granda jurada aviá acusat l’èx-agent Brett Hankison de negligéncia grèva pertocant la mòrt de Breonna Taylor, del temps que dos autres policièrs, John Mattingly e Miles Cosgrove, èran pas acusats. Hankison foguèt licenciat de la polícia per aver mancat als protocòls de procedura e per son accion dins la mòrt de Breonna Taylor que “mostrèt una indiferéncia extrèma per la valor de la vida umana”.
 
 
Fusilhada pels policièrs durant una perquisicion “erronèa”
 
Breonna Taylor èra una ambulancièra afroamericana de 26 ans que la tuèron lo mes de març passat. Durant una perquisicion “erronèa” los policièrs, abilhats en civil, li tirèron uèch balas mentre que dormissiá amb son calinhaire dins son apartament a Louisville. Avián esclatat la pòrta sens la prevenir, dins l’encastre d’un avís de recèrca erronèu que concernissiá un suspècte que demorava pas pus dins l’immòble e qu’èra ja estat detengut.
 
Segon lo rapòrt de la polícia de Louisville, lo calinhaire de la victima aviá tirat sus la camba d’un policièr. Sul pic foguèt acusat d’aver temptat d'assassinar un policièr. Son avocat assegurèt que l’òme sabiá pas que los qu’intrèron a l’ostal foguèsson de policièrs.
 
Segon los testimoniatges dels vesins, los agents s’identifiquèron pas coma d'agents de polícia.
 
 
 

At least 46 people were arrested in Louisville protesting the decision to not charge 3 officers for the police killing of #BreonnaTaylor.

▪️ Protests began mostly peaceful
▪️ Police fired chemical agents, flash bangs 30 min before curfew
▪️ 2 officers shot, wounded in clashes pic.twitter.com/VGc4bK1gyc

— AJ+ (@ajplus) September 24, 2020