Bandièra01 1180x150: Comuna de Tolosa

Actualitats

Internacional

Secutament dels jutges espanhòls contra las presonièras politicas catalanas

Carme Forcadell e Dolors Bassa son tornadas al regim d’embarrament total perque an pas demostrat “de pentiment” ni “de reeducacion”

Arribada de Carme Forcadell a la preson de Wad-Ras (Barcelona)
Arribada de Carme Forcadell a la preson de Wad-Ras (Barcelona) | Albert Salamé
Las presonièras politicas catalanas Carme Forcadell e Dolors Bassa tornèron intrar divendres de ser en preson dins un regim d’embarrament total. E mai aguèsson beneficiat d’un regim penitenciari dobèrt, dins lo qual anavan dormir en preson del diluns al dijòus, la Cort Suprèma espanhòla decidiguèt de lo lor levar car, segon los jutges, per l’aver cal demostrar un pentiment e una reeducacion que las presonièras an pas demostrat. En mai d’aquò, los jutges an decidit de refusar a totes los presonièrs politics catalans lo benefici de poder sortir trabalhar o far de trabalhs socials fòra de la preson. La rason es tanben “la manca de reïnsercion”.
 
Çò que se ven de passar ara amb las presonièras politicas, aguèt luòc a la fin de julhet amb los presonièrs politics. La Cort Suprèma espanhòla, los jutgèt e condemnèt, s’atribuiguèt un poder que l’aviá pas. Atal solament li caliá la demanda del ministèri public per enebir sul pic que los presonièrs politics catalans poguèsson viure fòra de la preson qualques oras per jorn. Lo ministèri public faguèt aquela sollicitacion sul pic per totes los presonièrs politics catalans, mas la senténcia per Forcadell e Bassa es arribada ara.
 
Carme Forcadell intrèt dins la preson de femnas de Wad-Ras, a Barcelona, acompanhada per una molonada de manifestants, e parièr se passèt amb Dolors Bassa a la preson de El Puig de les Basses, près de Figueres. “Qué que fagan, nos rendrem pas e contunharem”, çò diguèt Bassa abans d’èsser encarcerada. Las doas dònas enregistrèron de messatges en vidèo suls rets socials que podètz veire en seguida.
 
De son costat, l’associacion dels procuraires espanhòls festegèt suls rets socials l’empresonament de las doas presonièras politicas e que los presonièrs politics demorèsson embarrats.

 
 
 
 
 
 




abonar los amics de Jornalet

 



 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

Coma dins la Russia de Stalin, lo qu'es pas d'acòrdi es qu'es un malaute mental. Li cal far un tractament psiquiatric. Los totalitarismes, siagan de drecha o d'esquèrre se semblan totes.
Ieu ai un autre diagnostic : Espanha es en mans de jutges faissistas.

  • 9
  • 0

Escriu un comentari sus aqueste article