De militants ultradrechistas del grop Generacion Identitària se son installats a la frontièra entre Comenge e la Val d’Aran. Un trentenat de personas dison que susvelhan, dempuèi dimars, lo còl del Portilhon, entre Quate-Lòcs e Luishonés, e lo ponch frontalièr de Garona entre Quate-Lòcs e Vavartés. Asseguran que vòlon empedir l’intrada de migrants e de refugiats sul “sòl francés” e es per aquela rason que son a “susvelhar tot passatge eventual de migrants e n’alertar las autoritats”.
 
 
Indignacion dels elegits
 
La presidenta de la region que ten lo nom d’Occitània, Carole Delga, a demandat al prefècte e de la region que meta fin “fermament e sens retard a aquel còp de fòrça contrari a las valors de la Republica”. E mai a dich qu’aquel “gropuscul d’extrèma drecha deu èsser dissolgut el Ministèri de l’Interior” francés. Delga a fach aquela crida amb lo president del Conselh Departamental de Nauta Garona, Georges Meric, lo deputat local Joël Aviragnet e lo cònsol màger de Luishon, Eric Azémard.
 
A mai, per Azémard s’agís d’una operacion “menada en tota illegalitat” que sa tòca es solament de far de difusion mediatica e de desvolopar lor discors de l’òdi.
 
 
“Son restats un pauc e puèi son partits”
 
La gendarmariá locala a confirmat als jornalistas de Le Parisien, qu’an rescontrat aqueles individús al Portilhon e tanben a la frontièra entre Mèlas e Pònt d’Arrei. Segon los policièrs, son simplament “de personas amb de bandièras” qu’i “son restadas un pauc e puèi son partidas”. A mai, los quites gendarmas an confirmat qu’aquel pas transfrontalièr es de plan pauca frequentacion en comparason amb los de las autoestradas dels costats de Catalonha e del Bascoat.
 
 
Obsession de las frontièras interoccitanas
 
Es pas lo primièr còp qu’aqueste gropuscul ultradrechista vòlon contrarotlar una frontièra interoccitana. Fa dos ans, se placèron sul còl de l’Eschala, ont i a una frontièra politica que separa Briançonés e la Val d’Ors. Alara, volguèron “barrar la rota” als migrants. Aquel còp, totun, i aviá vertadièrament de refugiats que fugissián e que capitèron ben malgrat los xenofòbs, gràcias a la solidaritat de militants occitans dels dos costats de la frontièra politica.
 
 

Avec @GeorgesMeric, @JAviragnet et le Maire de #Luchon, je demande au @PrefetOccitanie de mettre fin fermement et sans délais à ce coup de force contraire aux valeurs de la République.
Ce groupuscule d’extrême-droite doit être dissous par @Interieur_Gouvhttps://t.co/9e633ZgHtq

— Carole Delga (@CaroleDelga) January 19, 2021