Bandièra01 1180x150: País Invisible

Actualitats

L’Assemblada Nacionala francesa a aprovada la Lei Molac

Es un eveniment istoric car s’agís de la primièra lei francesa per la reconeissença e la promocion de las lengas autoctònas de la Republica, dempuèi la Lei Deixonne de 1951 que n'autorizava l'ensenhament public

| Collectif Pour Que Vivent Nos Langues
 
 Mesa a jorn a 17:00. L’Assemblada Nacionala francesa a aprovada la Lei Molac per 247 vòtes en favor e 76 contra. Es un eveniment istoric car s’agís de la primièra lei francesa per la reconeissença e la promocion de las lengas autoctònas de la Republica, dempuèi la Lei Deixonne de 1951 que n'autorizava l'ensenhament public. Se reconeis pel primièr còp l’ensenhament immersiu, se reconeis tanplan la senhalizacion bilingua e se permetrà que los rèirenoms pòrten de caractèrs qu’existisson pas en francés coma la “ñ” del breton o los accents sus cèrtas vocalas de l’occitan. Mai d’informacion sus France 3 Bretanha e dins l’edicion de deman de Jornalet 
   



Informacion a 3h00: La Lei Molac arriba uèi a son moment decisiu

Se presenta uèi en segonda lectura a l’Assemblada Nacionala francesa la proposicion de lei per la reconeissença e la promocion de las lengas autoctònas de l’estat francés


Se torna presentar uèi en segonda lectura a l’Assemblada Nacionala francesa una proposicion de lei per la reconeissença e la promocion de las lengas autoctònas de l’estat francés, dichas regionalas, portada pel deputat breton Paul Molac. Lo debat se ten a partir de 9h.
 
Podètz seguir lo debat en dirècte a partir de 9h sus: videos.assemblee-nationale.fr.
 
Vojada de substància pertocant l’ensenhament dins sa primièra lectura en febrièr de 2020, la proposicion de lei foguèt enriquida pel Senat en decembre passat. Per aquela rason, lo debat d’uèi es una escasença per tornar a la dicha “Lei Molac” son sens inicial. Cal apondre que la proposicion de lei ten l’oposicion del ministre de l’educacion, Jean-Michel Blanquer, que  tornarà probablament ensajar de la vojar de substància quant a l’ensenhament.
 
 
Per l’ensenhament immersiu
 
Un emendament depausat per la senatritz alsaciana Laurence Muller-Bronn (LR), adoptat al Senat contra lo vejaire del Govèrn, oficializariá l'ensenhament immersiu dins l’educacion publica, çò rapòrta Mediabask. “Se lo tèxt es votat tal coma es escrich, l’immersiu a l'escòla publica aurà una basa legala. Aquò seriá la granda novetat. Seriam pas pus dins lo camp de l'experimentacion”, çò i explica lo senator basco Max Brisson (tanben LR).
 
Un autre emendament important, se s’apròva, permetriá a las comunas de finançar de calandretas o d’ajudar financièrament los mainatges qu’assistirián als corses de la calandreta d’una autra comuna. Legissèm encara dins Mediabask que “l'emendament pus important es lo que crèa las condicions de finançament per las comunas de las escòlas immersivas pels enfants venguts d'autras comunas ont i a pas d'ensenhament immersiu”.
 
 
Sosten de las regions e d’EELV
 
Lo collectiu Per que viscan nòstras lengas a menat a bon tèrme un important trabalh de sensibilizacion al près dels 577 deputats, per lor explicar l'importància d'aquela lei e los convéncer d'adoptar lo tèxt.

Delà lo sosten de son partit, Regions e Pòbles Solidaris, e de sos sòcis coma lo Partit Occitan, Euròpa Ecologia Los Verds (EELV) a manifestat son sosten a la proposicion de Paul Molac. EELV pòrta son sosten a totas las deputadas e totes los deputats per votar de biais confòrme la proposicion de lei e per que lo debat sus la ratificacion de la Carta Europèa de las Lengas Regionalas o Minoritàrias se torne dobrir.
 
Tanben l’associacion Regions de França a fach una crida a adoptar la proposicion de Paul Molac.
 
La bala es ara dins lo camp dels 577 deputats de l’Assemblada Nacionala francesa.


 
 




abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Loïson Ispora
18.

Hens l'edicion Païs Basco deu "Sud-Ouest" de ger, ua pagina sancèra sus l'adopcion de la lei. Hens las autas edicions (Bearn e Sola, Lanas, Olt e Garona, Dordonha, las 3 de Gironda e las 2 de Charentas): arren, ni ua linha.

  • 3
  • 0
Fred Tolosa
17.

#16 Sul sit de l'assemblada nacionala.

  • 2
  • 0
Nadal
16.

#14 Onte se pòt trobar la lista dels noms dels deputats qu'an votat contra la lei Molac ?
Mercés

  • 7
  • 0
palma Palma
15.

Una victoria clara important de la cultura e los progressistas qu' an donat pas a una nova França mai justa. Visca la lenga dels Trobadors e la fonetica occitano-catalan. Urrà !!!!!!!!!

  • 6
  • 0
Fred Tolosa
14.

#13 Cal pas res esperar de Melenchon e de sa còla d'ultras jacobins. Aquel tipe es nòstre enemic. An quasi totes votat contra, los de LFI.

  • 13
  • 0

Escriu un comentari sus aqueste article