Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'AranQuate Lòcs

Aran exigís la redobertura de la frontièra del Portilhon

Las autoritats francesas barreròn lo pas entre Quate Lòcs e Luishonés en genièr passat per una presumida “menaça terrorista”

Tèxte legit

La sindica d’Aran, Maria Vergés, e lo cònsol màger de Bossòst, Amador Marqués, an mandat una letra al prefècte del departament de Nauta Garona, Étienne Guyot, per demandar la redobertura de l’estrada del Portilhon, entre Luishon e Bossòst, que l’estat francesa barrèt en genièr passat per una presumida“menaça terrorista”. S’agís de l’estrada D618A, del costat luishonés, dicha N141, del costat aranés.
 
Per Vergés, lo Portilhon es un passatge plan important pels abitants d’Aran e de Comenge, mai que mai per Bossòst e Luishon, qu’an de besonh d’aquela via de comuncacion per completar de servicis de santat, espòrts, educacion, etc. De son latz, Marqués remarca que la decision de barrar la frontièra es “unilaterala” e que contraven a l’acòrdi de Schengen, çò rapòrta Aran Notícies.
 
Lo barrament d’aquel ponch frontalièr poiriá tanben afectar lo Torn Ciclista de Vielha que se debanarà lo 24 de julhet e que deu passar pel Portilhon. Per aquela rason, Vergés e Marqués an demandat a la prefectura que permetèsse lo debanament de la corsa, que ten lo sosten del Conselh General d’Aran e de la Comunautat de Comunas de Pirenèus-Nauta Garona.
 
Al començament de genièr, las autoritats francesas tampèron aquel ponch frontalièr pr'amor d'una sospechada menaça terrorista. Aital o comunicava lo prefècte Guyot, en seguida de las recomandacions del president francés, Emmanuel Macron, compte tengut de l’evolucion de la menaça terrorista.

 


abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article