Bandièra01 1180x150: La Passem

Actualitats

InternacionalPoliticaSocietat

Los servicis secrets espanhòls volián far paur a Catalonha e aurián permés l’atemptat terrorista de 2017

O assegurèt dimars passat davant los jutges un èx-comissari acusat d’organizacion criminala, subornacion e blanquiment d’argent

Lo jutjament de l’èx-comissari de la polícia nacionala espanhòla José Manuel Villarejo a congreat un enòrme rambalh en Catalonha
Lo jutjament de l’èx-comissari de la polícia nacionala espanhòla José Manuel Villarejo a congreat un enòrme rambalh en Catalonha

Tèxte legit

Lo jutjament de l’èx-comissari de la polícia nacionala espanhòla José Manuel Villarejo a congreat un enòrme rambalh en Catalonha. Villarejo assegurèt dimars passat davant los jutges que los servicis secrets de l’estat espanhòl (CNI) èran darrièr los atemptats terroristas que los patiguèron Barcelona e Cambrils en agost de 2017, e ont moriguèron 15 personas e mai d’un centenat foguèron nafradas. “Lo CNI voliá far paur a Catalonha” mas el trabalhèt per adobar aquel far, car lo CNI n’aviá “calculat mal las consequéncias”, çò diguèt l’èx-comissari jutjat. Sul pic, se tenguèt en Catalonha de manifestacions qu’exigissián de conéisser la vertat del temps que los partits catalans demandavan a Madrid que se dobriguèsse una enquista e èran a estudiar cossí entreprene d’accions legalas. A Madrid, per ara, i a totjorn de silenci sus l’afar.
 
Las declaracions de l’èx-policièr jutjat, se son veraias, confirmarián quicòm que se denóncia dempuèi qualques annadas. Ja en julhet de 2019 lo jornal espanhòl Público revelava que lo CNI èra en contacte amb l’imam de la vila de Ripoll, Abdelbaki Es Satty, cervèl d’aqueles atemptats terroristas. Segon aquelas informacions, Es Satty èra confident del CNI fins al moment de sa mòrt, qualques oras abans los atemptats, e lo CNI èra al corrent que los terroristas preparavan aquela ataca sus la Rambla de Barcelona. Público presentèt de documents escriches que demostrarián la relacion dirècta entre lo CNI e Es Satty fins al darrièr moment.
 
Villarejo es jutjat per aver prepausat de servicis privats d’espionatge del temps qu’èra comissari de la polícia e aviá accès als documents secrets de l’estat. Arribèt d'amolonar un patrimòni de 20 milions d’èuros e son procès s’es esperlongat dempuèi 2017 per sa complexitat pr’amor que tòca divèrsas entrepresas (el ne comandèt 43) e pel fach que l’acusat ten un fum d’enregistraments àudio fòrça delicats. Es acusat d’organizacion criminala, subornacion e blanquiment d’argent.
 
 
 
 

abonar los amics de Jornalet
 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
5.

Lo desfrés de Villarejo es una nova caricatura del facha, segur que qualcú se li ocorrererà al carnaval o als umoristas. Amb l'uolh tapat coma un pirata, la boina d excombatent franquista e la mascareta, es tot un fantasma.

  • 2
  • 2
Astrau Peiròla de Provença
4.

#2 Leis Estats son sovent leis actors politics lei mens geinats per agir 'mbé leis islamistas. Utilisan lo pantais de "l'islamisme que nos envaïsse" per aumentar lo poder repressiu estatau e per caçar lei personas musulmanas que li fan paur a son nacionalisme e son racisme. Mentre qu'Espanha laissa faire leis atemptats per faire paur ai catalans, França es a atacar leis universitats, lei comunautats musulmanas, leis ensenhants, l'oposicion politica sota lo pretèxte "d'islamisme" pendent que vènde d'armas e sotèn directament de règimes islamistas...

  • 5
  • 1
Franc Bardòu
3.

#2 "Far páur a la Catalonha" consistís a la terrorizar. Entre 36 e 39, lo metòdi èra lo meteis, mas los mejans d'anar un pauquet mai decomplexats. Totun, per la racalha franquista, res non càmbia … L'etica es la meteissa.

  • 6
  • 1
Pitaluga
2.

Se sap dempuèi bèl brieu aquò de las relacions entre terroristas islamistas e servicis secrets espanhòls. A condicion de pas jogar al monin sord, bòrni e mut. E aquel còp, i aguèt de mòrts.
I a pas a dire, l'estat espanhòl es un estat mafiós.

  • 13
  • 1
francesc palma
1.

Publico es un diari progresista e lo que deia que sabia que lo CNI e l' imam de Ripoll era un confident sieu ja o diu tot. No m'extranya que tot sia cert amb personatges coma Villarejo.

  • 6
  • 1

Escriu un comentari sus aqueste article