Bandièra01 capçalera  1180x150: Novestivada

Actualitats

La justícia polonesa perlonga de tres meses la preson preventiva del jornalista basco Pablo González

Fa gaireben sièis meses que González es encarcerat e practicament enebit de comunicacion, sens saber de quines delictes l’acusan

Tèxte legit

Lo tribunal regional de Przemyśl (Polonha) a decidit de perlongar de tres meses la preson preventiva del jornalista basco Pablo González, coma o aviá demandat lo procuraire, 177 jorns après son encarceracion. La rason evocada es que i a un “chepic per una frauda de procedura e se crenh que s’amague o fugisca”; tanben se soslinha que González risca una pena elevada. Segon son avocat, Bartosz Rogasa, lo tribunal a pas rendut publica la justificacion.
 
Fa gaireben sièis meses que Pablo González es embarrat, practicament sens poder comunicar. L’acusan d’èsser un espion del Kremlin, çò qu’el refusa de tot en tot. L’intelligéncia espanhòla aviá enquistat sul jornalista, acusat d’aver trabalhat al jornal basco Gara.


Lo 28 de febrièr passat, los servicis secrets poloneses l’arrestèron a Przemyśl. Èra lo segond còp que d’agents secrets lo prenián per un espion. Lo 6 de febrièr, foguèron los servicis secrets ucraïneses que l’interpelèron mas eles lo daissèron partir. Ara, es pas solament encarcerat en Polonha mas es privat de comunicacion e a pas pogut parlar amb sa familha ni mai amb son avocat, Gonzalo Boye, qu’es lo meteis que defend Carles Puigdemont. De fach, la familha del jornalista deguèt esperar durant de longas setmanas per recebre una comunicacion formala de las autoritats polonesas, que los informava que Pablo González seriá en preson provisòria almens fins al 29 de mai.


Aquela notificacion especificava lo nom en castelhan del jornalista amb una error tipografica (Gonzales per González) e dos escaisses: Aleksey Rubstov e Pavel Rubstov. Totun, son pas d’escaisses ni mai d’identitats falsas. Coma o aviá precisat Público, un dels jornals pels quals Pablo González trabalhava, Pavel Aleksevich [nom patronimic segon lo rèirenom de son paire] Rubstov es lo nom amb lo qual foguèt enregistrat quand nasquèt a Moscòu en 1982. I demorèt fins a sos nòu ans, quand sos parents divorcièron e que partiguèt amb sa maire en Bascoat d’ont aquesta es originària. Al moment d’obténer lo ciutadanatge espanhòl, la maire traduguèt en espanhòl lo rèirenom (Pavel per Pablo) e l’inscriguèt amb son nom de familha González e lo nom del grandpaire mairal Yagüe.


Pablo González estudièt la filologia eslava e parla rus e polonés. Tot aquò lo menèt a venir jornalista independent especializat en l’espaci pòstsovietic e a raportar sus plaça los eveniments mai importants de las darrièras annadas coma las protèstas d’Ucraïna de 2014 —que s’acabèron amb un cambiament de govèrn— e l’annexion russa de Crimèa.
 
 
Acusat d’èsser un espion rus per aver collaborat amb lo jornal basco Gara
 
Lo 5 de febrièr, González se trobava a Avdiivka, en Donetzk. Aviá pachat de far una connexion en dirècte per una television espanhòla, La Sexta, per fin d’assabentar de la vida de la populacion civila a un moment que ja se crenhiá una possibla invasion russa d’Ucraïna. Coma o expliquèt Juan Teixeira, un fotojornalista qu’èra amb el, volguèron far la connexion en dirècte, mas èran susvelhats per de militars. Mas après esperar 45 minutas sens reüssir a se connectar, los militars ucraïneses cancelèron la connexion e lor faguèron escafar lo material enregistrat pendent aquel moment. Puèi prenguèron una fòto del passapòrt de González. Aquela meteissa nuèch, recebèt una telefonada dels servicis secrets ucraïneses que li demandèron de se presentar a Kyiiv al pus lèu possible. E i anèt sul pic.
 
Abans d’intrar en çò dels servicis secrets, González diguèt a sos collègas que, en cas que foguèsse retengut mai de doas oras, publiquèsson un messatge suls rets socials per o anonciar. Eles o faguèron. 40 minutas apuèi, poguèt sortir e publiquèt sus Twitter qu’avián copiat l’informacion que i aviá dins son telefòn mobil. Pus tard, expliquèt que l’avián acusat d’èsser un espion rus amb d’arguments rocambolesques coma lo fach d’aver collaborat amb lo jornal basco Gara o d’aver una carta bancària de Laboral Kutxa, una banca cooperativa basca que, segon los servicis ucraïneses, seriá finançada per Russia. Mentretant, d’agents de l’intelligéncia espanhòla (CNI) èran al domicili del jornalista en Bascoat, e tanben en Catalonha, per interrogar sa familha e sos amics pròches. Per tant, González decidiguèt de tornar en Bascoat.


 
Preson e isolament en Polonha
 
Talnlèu rintrat, González mandèt un messatge àudio a un amic ont explicava lo rescontre amb los servicis secrets ucraïneses e las perquisicions del CNI. “Me demandèron se tocavi d’argent, e ne tòqui lo just. Pòdon agachar mos comptes bancaris. Ai qualque ajuda de mon paire, qu’a un parelh d’apartaments a Moscòu, que los lòga e me’n dona una part. Mas aquò es pas res, una quantitat d’argent infima”, çò disiá. A mai, insistissiá per dire que tot çò que fasiá èra de jornalisme, pas d’espionatge. “Sabi pas çò qu’inventan”, çò disiá.
 
En Bascoat demorèt pas longtemps, perque tanlèu començada l’invasion russa d’Ucraïna, lo 24 de febrièr, el se gandiguèt en Polonha, a la la frontièra ucraïnesa, per cobrir l’arribada dels refugiats. La darrièra aparicion publica de González abans sa detencion foguèt una connexion en dirècte dins l’emission de television La Sexta Noche de la gara Przemyśl estant.
 
Aquò foguèt lo 26 de febrièr, qualques minutas abans miejanuèch. González foguèt arrestat dins la nuèch del 27 al 28 pels servicis secrets poloneses, que li permetèron solament una telefonada, que la faguèt a sa femna. L’endeman, son avocat, Gonzalo Boye, assabentèt de la detencion amb un messatge sus Twitter que Reportèrs Sens Frontièras partegèt sul pic per exigir sa liberacion immediata. A causa de la manca d’informacions, una pòrtavotz del partit basquista EH Bildu al parlament espanhòl demandèt al primièr ministre, Pedro Sánchez, que son govèrn intercediguèsse per fin que foguèsse desliurat. “Coma me n’a assabentat lo ministre dels afars estrangièrs, lo jornalista espanhòl aurà una assisténcia consulara. Sèm ja en contacte amb el a travèrs de nòstres servicis consulars”, çò diguèt Sánchez.
 
L’endeman, lo govèrn polonés publiquèt un comunicat que confirmava sa detencion e que raportava que Pablo González èra acusat d’un delicte d’espionatge pel qual riscava de penas de fins a dètz ans de preson. Pasmens, foguèt sonque al 8n jorn après son arrestacion que lo cònsol espanhòl lo rescontrèt. Lo diplomata diguèt que se trobava en bon estat fisic e qu’aviá lo moral. Mas, aquel meteis vèspre, lo govèrn espanhòl mandèt d’informacions als mèdias espanhòls per dire qu’èra pas marrida la teoria que Pablo González foguèsse un espion rus, pr’amor qu’aviá una dobla vida, la de Pablo González e la de Pavel Rubstov, en seguissent lo rasonament de las autoritats polonesas.
 
De Polonha estant, lo ministre dels afars estrangièrs espanhòl, José Manuel Albares, declarèt que González comptava sus l’assisténcia consulara e que li avián assignat un avocat comés d’ofici. Per contra, las autoritats polonesas permetèron pas que son avocat, Gonzalo Boye, lo vesitèsse en preson, e exigiguèron que tornèsse mandar tota la documentacion sus González, la meteissa que l’aviá ja mandada una setmana abans, mas ara amb una traduccion jurada.
 
Lo 23 de març, la familha recebèt la primièra comunicacion formala de la detencion, que los informava que Pablo González seriá en preson provisòria almens fins al 29 de mai. Aquel meteis jorn, son avocat comés d’ofici renoncièt a sa carga. Las autoritats li n’an assignat un autre fins que Boye designe un avocat polonés de fisança.

 
 






abonar los amics de Jornalet

 

 
 
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

007
3.

Cal compréner l'embrolha pels poloneses : lo tipe a un nom espanhol, se ditz d'un païs que se sona Euzkadi e qu'oficialament existis pas en Europa, e ceresa sus la coca, aquel Gonzalez parla rus e a tanben la nacionalitat russa. Bonjorn l'embrolha !

  • 0
  • 5
Lo mèrle Las Brondas
2.

L'injustícia polonesa perlonga de tres meses la preison preventiva del jornalista basc Pau González ; preventiva, comprtenètz, de còps que foguèsse realament basc, aquel espanhòl non-criptofranquista… Un pauc d'òrdre fa pas de mal !

  • 6
  • 3

Escriu un comentari sus aqueste article