Bandièra01 1180x150: País Invisible

Actualitats

L’armada iraniana a bombardat lo Curdistan iraquian en tuant 13 personas

Las butas èran d’organizacions curdas qu’Iran acusa d’aver desencadenat las revòltas. Iraq o considèra coma una violacion de sa sobeiranetat

| Reuters

Tèxte legit

L’armada iraniana a bombardat amb de missils e drònes lo Curdistan iraquian ont las autoritats an raportat 13 personas tuadas, segon Reuters. Las butas èran lo Partit Democratic Curd e lo Partit per la Liberacion de Curdistan e Komala, que los considèra Iran coma d’organizacions terroristas e que los acusa d’aver butat a la revòlta democratica e laïca dirigida per de femnas. De remembrar que l’a desencadenada la mòrt de Jina Amini (oficialament Mahsa Amini), una femna curda de 22 ans detenguda a Teheran per non portar pas “adeqüatament” lo cairat islamic.
 
Iraq a convocat l'ambaissador iranian per l’assabentar de l'objeccion d'Iraq a las atacas contra los territòris iraquians e li comunicar qu'Iraq considèra aquela accion coma una violacion de sa sobeiranetat. Tanben los Estats Units e Alemanha an condemnat l’accion.
 
Mentretant en Iran, la repression de las protèstas es tot un chaple e lo bilanç de las mòrts supèra las 76 personas tuadas per las fòrças de l’òrdre, segon las donadas d’Iran Human Rights publicadas diluns.
 
En Iran, e sustot al Curdistan oriental, se ten una revòlta democratica e laïca dirigida per de femnas, desencadenada per la mòrt de Jina Amini (oficialament Mahsa Amini), una femna curda de 22 ans que l’avián detenguda a Teheran per non portar pas “adeqüatament” l’hijab.
 
De manifestacions an luòc dins una ochantena de vilas ont se denóncia “de detencions massissas”. Jols crits de “justícia” e “libertat” los imatges de las protèstas son mai que mai de femnas que mòstran lor pel e crèman lor cairat islamic e mai de representacions de l’aiatollà Khomeini, fondador de l’actual regim teocratic. La polícia emplega de gases lacrimogèns, de canons d’aiga e de fuòc real per reprimir las protèstas.


abonar los amics de Jornalet

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article